Mikhailo Molnar

Михайло Иванович Молнар, *4. фебруар 1912, Голубине, Свалявскый округ, Австро-Мадярщина – †18. децембер 1997, Голубине, Свалявскый район, Украина — педагог, фолклорист и прозаик, културный дѣятель. Брат Василя Молнара.

Походив з родины земледѣлцьох Ивана Молнара и Марии Улѣганець, де было восьмеро дѣти (четыри хлопцѣ и четыридѣвкы), меджи котрыма быв найстаршым. По закончѣню 6-класной народной школы в родиску (1924) зачав ся учити в Ужгородской гимназии, а завершив гимназиалны штудии в Мукачовской гимназии (1932). Мав дяку на высокошколскы штудии в Празѣ, але худобность родины то не доволила. Учительовав в селах Свалявского округу (Сасовка, Поляна, Сусково, Солочин).

В часѣ войны быв мобилизованый до мадярского войска и бойовав на выходном фронтѣ. По войнѣ зыскав фах учителя истории и географии (екстерно). Од самого зачатку украинской добы быв организатором школства як школный инспектор Свалявского округа, а цѣлых 30 рокы быв директором 7-рочной, а пак 8-рочной школы в Голубиному (1945–1975). Инициовав добудову «народным методом» штока партеровой школы, резултатом чого было выучованя на едну змѣну, были створены предметны кабинеты. Од него ся зачала и велика учительска династия Молнарох, уже в трьох генерациях числяча понад 30 педагогы.

В часѣ своей педагогичной роботы быв активным организатором културной чинности и много раз быв повѣреный сполоченскыма функциями: подпредсѣдник сельской рады, посланець районной рады, голова районной комисии з културы и школства, член областной и районной обрядовых комисий. По одходѣ з педагогичной роботы до пензии продовжовав ативну културну чинность. Михайло Молнар вызнаменаный похвалныма вызнанями Министерства освѣты Украины, знаком Взоровый працовник освѣты Украины, медайлов А. С. Макаренка, медайлов За трудову доблесть, титулом Заслуженый учитель Украины. Стояв у чолѣ обновленого районного Общества Александра Духновича. На будинкови голубинской школы вдячны краяне отворили памятну таблу Михайлови Молнарови.

Литература

Зачав писати ещи в штудентскых роках. Публиковав ся в часописѣ Наши стремления (1941), в алманаху молодых литераторох (1943).Записовав фолклор, инсценовав даколько народных казок про театралны кружкы. В року 1935 окремыма брожурами выйшли его дѣточы пьесы Злый Петро и Дѣд Мороз и бабушка Зима. Од 1960-х рокох немало новел, черт, усмѣвох, фолклорно-етнографичных материалох опубликовав в свалявской районной новинцѣ. Найвекшой популарности заслужили гуморескы, писаны мѣстнов бесѣдов, з котрыма смѣшили публику на концертах, критикуючивады сполоченского и каждоденного живота. Незадовго до смерти выйшли его "Голубинські бувальщини" (1997) — зберька интересных историй, взятых з реалного минулого живота и переповненых духовитыма фиглями. Посмертно выйшли фолклорны запискы Вичурки у вуйны Полані (Свалява, 2002, сполуавтор В. Молнар).

Фолклор и сцена

Як правдивый запаленик розвою и помножѣня културы, умѣня в Голубиному организовав зо своима еднодумцями многожанрове учньовске аматерске умѣлство, а тоты колективы суть познаты и витаны ай в районѣ, ай в области: хор Голубинська борона, женскы вокалны зборы Семеро сестры Молнаровы, Голубинскы свашкы, хлопскый вокалный збор Семеро братя Цимболинцѣ ай иншы. Тоты фолклорно-етнографичны колективы успѣшно выступали на многых сценах и в програмах Закарпатской областной телерадиокомпании, доставали награды районных, областных и республиковых конкурзох, были нафилмованы во филмах. Михайло Молнар зберав предметы хыжного и газдовского хоснованя. Етнографичны колекции передав до Свалявского историчного музея и до школного музея вГолубиному.

• Алмашій, Михайло. Молнар Михайло. //Русинська педагогічна енциклопедія. Ужгород: Карпатська Вежа, 2005. C. 161. ISBN 966-2674-43-X. укр.
• Гомоннай В. В.. Михайло Іванович Молнар. //Антологія педагогічної думки Закарпаття (XIX–XX ст.). Ужгород: «Закарпаття», 1992. Cс. 226–228. укр.
• Долинич Й.. Молнар Михайло Іванович (1912–1997) .... Визначні діячі Свалявщини. cc. 26–31. https://en.calameo.com/read/0046711928c0fe4a12098. [перевірено 2022-02-16]. укр.