Quick Facts
Biography
Juha-Miguel Peltomaa (š. 1997 Cali, Kolumbia) lii syemmilâš seevvimkielâ artist já seevvimkielâlâš sispelji-implaant kevttee. Peltomaast láá kyehti eenikielâ: suomâkielâ já syemmilâš seevvimkielâ. Sun kiävttá kuábbáá-uv piäiválávt.
Eellim
Miguel Peltomaa šoodâi masa ollásávt kullen, mut neelji-ihásâžžân suu kulo kuuloold huánnánškuođij. 12-ihásâžžân sun finnij čuopâdâsâst sispelji-implaant, ađai šleđgâlii kuullâmpiergâs. Sun lii kiävttám meid ärbivuáválii kuullâmpiergâs. Kuullâmpiergâsijd sun ij kuittâggin haalijd ain kevttiđ, iäge toh adelâm sunjin kulo maassâd ollásávt.
Pargo
Miguel Peltomaa lii Uđđâ muusik kišto seevvimkielâlâš laiđiisteijee. Suu pargon lii tulkkuđ kištopittáid taiđâlávt. Muusik lii sunjin kuittâg tehálâš äšši, já sun ráhtá muusik jieš-uv VisualVoice- já Metsäorkesteri Käet ylös! -juávhoin. Sun parga meid Yle Kioskist toimâtteijen já lii lamaš fáárust Pikku Kakkonen -párnáiohjelmijn rähtimin siskáldâs seevvimkielâláid párnáid.
Palhâšumeh já tubdâstâsah
Seevvimkielâpeeivi 2024 Peljittemij litto mieđettij Peltomaan ive 2023 Ive seevvimkielâtaho -palhâšume, tastko sun lii lasettâm vijđásávt tiäđulâšvuođâ seevvimkielâst já seevvimkielâlijn ubâ Suomâst.