Menna Gwyn

Darlledwraig o Gymraes oedd Menna Gwyn (23 Gorffennaf 1941 – 6 Ebrill 2006) a oedd yn llais cyfarwydd ar BBC Radio Cymru.

Bywyd cynnar ac addysg

Bu'n astudio ym Mhrifysgol Aberystwyth rhwng 1959 a 1962. Penodwyd ei gŵr Aled yn weinidog ar Eglwys Henllan Amgoed, Sir Gaerfyrddin yn Medi 1966 a daeth Menna yn rhan o fywyd cymdeithasol yr ardal.

Bu'n athrawes yn Ysgol Pantycaws am rai blynyddoedd, cyn cael plant. Cychwynnodd Cangen Hendygwyn o Ferched y Wawr yn 1970 a sefydlodd Cylch Meithrin yn ei chartref, tua 1972. Roedd hefyd yn cymryd dosbarthiadau nos i Ddysgwyr, yn Ysgol Griffith Jones.

Gyrfa

Bu'n actores yn y 1970au pan ddaeth yn aelod o gast gwreiddiol Pobol y Cwm gan chwarae Nyrs Jenni rhwng 1974 a 1975.

Wedi hynny daeth yn gyhoeddwr gyda Radio Cymru gan gysylltu rhaglenni a darllen bwletinau newyddion. Roedd yn adnabyddus am ei llais cyfoethog a ddisgrifiwyd fel 'melfedaidd' gan Aled Glynne Davies. Bu'n cyflwyno rhaglenni fel Gwynfyd a Menna a'r Clasuron. Cafodd Menna ei phenodi'n Uwch Gyhoeddwr Radio Cymru ac roedd yn gyfrifol am arwain tîm o gyflwynwyr a chynnig hyfforddiant. Cynhyrchodd raglenni fel Beti a’i Phobol a Wythnos i'w Chofio hefyd.

Ar deledu bu'n cyflwyno ar y rhaglen deledu nosweithiol Heddiw.

Bywyd personol

Roedd yn briod a'r Prifardd Aled Gwyn a chafodd ddau o blant, Non a Rolant.

Bu farw yn 64 mlwydd oed ar ôl salwch hir.