Martin Döscher

Martin Döscher (* 3. Februar 1935 in Köhlen) is en düütschen Politiker von de CDU.

Döscher is 1935 as Söhn von Martin Döscher senior in Köhlen boren un hett en Twillingssüster. He hett in Köhlen von 1941 bet 1950 ok de Volksschool besöcht. Von 1951 bet 1954 weer he op de Ackerboschool in Beers un denn op’n Lehrhoff in Bruunsbrook.

He is 1968 in de CDU ringahn un weer twee Johr Kreisvörsitter von de Junge Union. 1970 is he Geschäftsföhrer von de CDU in’n Landkreis Cuxhoben worrn. In’n Oktober 1968 keem he in’n Gemeenraad von de Gemeen Köhlen un is in’n November 1972 Börgermeester worrn. Ok in’n Raad von de Samtgemeen Beers is he von November 1972 af an inwesen. To’n 1. November 1976 is he in’n Kreisraad von’n Kreis Wersermünn wählt worrn un weer na de Kreisreform 1977 in’n Kreisraad von Landkreis Cuxhoben. Von’n 11. November 1991 af an weer he as Nafolger von Martin Steffens denn Landraad. To’n 31. Januar 2004 hett em Kai-Uwe Bielefeld aflööst.

För dree Wahlperioden weer Döscher von’n 21. Juni 1978 bet 20. Juni 1994 ok Maat von’n Landdag von Neddersassen.

1999 hett he den Ehrenteken in Sülver von’n Landkreis Cuxhoben kregen, 2002 in Gold un 2006 den Ehrenring. 1993 hett he dat Bundsverdeenstkrüüz an’t Band un 2004 dat Neddersassische Verdeenstkrüüz 1. Klass kregen. An’n 1. Februar 2004 is he Ehrenlandraad worrn.

Döscher is verheiraadt mit siene Fro Liesa un hett veer Kinner.

• Döscher sien Websteed (hoochdüütsch)