Marcel Launay

Marcel Launay, c' esteut on scrijheu e walon.

I skepia a Feroe (Fero, on hamtea d' Ferire) li 3d' setimbe 1890, et mora a Lidje li 19 di may 1944 (dins on bombårdumint des Aloyîs sol veye, ocupêye des Almands).

Di s' mestî, il esteut indjenieur foistî.

Come powete

I cmince a scrire e 1909 dins Li Clabot eyet Li ptit Lidjwès.

E 1922, i wangne si prumî pris a ene bate di powezeye del SLLW. I va ramexhner 42 beas bokets dins ene ramexhnêye lomêye Florixhåjhe (Florifâye) (1925).

I ratake après côp, et-z eplaidî «Les tchansons do bierdjî» (1937). Si dierinne ouve, k' i n' sava fini, «Les tchansons do moxhî» a stî eplaideye après s' moirt dins l' «Vie Wallonne».

Come sicrijheu d' teyåte

Come teyåtreus, a scrît sacwants pîces.

• Li moirt do Schoirçåd (li mwèrt dè hwèrça) (3 akes) (1927)
• Al rodje minire (1929) (c' est on no d' plaece di Ferire
• Li potale di bwès (1931)
• Li tchant do côr (1931)
• Pelé Rossea (sins date)
• Li bele coujhnire (sins date)
• Å tins des frambåjhes
• Li coirnou da Nenele (2 akes)
• Li sondje do moxhî (arimé, 2 akes)

Come romantî

I n' a scrît k' ene ramexhnêye di noveles, «Les contes do gåre di bwès» (1937).

Po-z esse on payizan

Po-z esse on payizan – payizan come djel so –

I fåt-st aveur bracné so les hôtès gonxhires

L' alnute, cwand les singlés dischindèt-st å galop

Viè les teres la k' i vnèt disterer les crompires.

I fåt-st aler tchaeke djoû, tcherdjî d' pezants shabots

Woeyî so ene trope d' åmayes, å mitan des brouyires

Avou les tchifes et l' front hålés des cwate solos

Et kécfeye doirmi ene nute å cour des sapinires.

I fåt esse côpeu d' troufes, taeyeu d' legnes, distrîxheu,

Et sawè cdure e måss, mågré l' plouve et l' houreus

Ene cope di foitès bayes atelêyes a l' eraire.

Et si rade ki djulete s' edoime loyminoymint

I fåt, sins fé nole xhene, soyî s' bounî d' frumint,

Tot mouyant di s' souweur li boune et frudjante tere.

1. ↑ Live Coppe p. 233; Cataloke Limpreur p. 39 & 81; Grosse antolodjeye Piron p. 437.
2. ↑ dins "Tåvleas d' Årdene" p. 8, "Florixhåjhe" p. 71 et dins l' grosse antolodjeye Piron p. 437-438.

• Dijhaedje do boket "po-z esse on payizan
• Li Wiccionaire si rsieve di sacwantès fråzes da Marcel Launay po-z enimådjî des mots k' i gn a.