Ludwig Alberti

Ludwig Alberti was landdros van Uitenhage.

Hy kom in 1802 in Kaapstad aan as kaptein van die Waldeck-bataljon. Die volgende jaar word hy aangestel as bevelvoerder van die garnisoen in Fort Frederick, Algoabaai. Die jaar daarna word hy aangestel as landdros van Uitenhage en wen algemene respek van die koloniste met sy invloed onder die swart opperhoofde, sy uitgebreide kennis en uitmuntende karakter. Kaptein Jacob Cuyler volg hom in 1806 op as landdros. In 1810 publiseer hy De Kaffers aan die Zuidkust van Afrika, natuur- en geschiedkundig beschreven. Hy vertrek in 1811 na die Ooste en word ernstig gewond in 'n slag teen die Engelse naby Batavia. Hy sterf die volgende jaar na 'n lang en smartlike lyding en word op 12 Junie daardie jaar begrawe.

• Albertyn, dr. C.F. (red.) 1962. Die Afrikaanse Kinderensiklopedie. Kaapstad, Bloemfontein, Johannesburg: Nasionale Boekhandel Bpk.