Levon Abrahamyan

Անվան այլ կիրառումների համար տես՝ Լևոն Աբրահամյան (այլ կիրառումներ)

Լևոն (Լև) Հարությունի Աբրահամյան (1928, մարտի 11, Ախալքալաք), հայ փիլիսոփա, փիլիսոփայական գիտությունների դոկտոր (1968), պրոֆեսոր (1971)։

Խմբագիր, հրապարակախոս Արամ Աբրահամյանի հայրն է։

Ծնվել է մարտի 11-ին, Ախալքալաքում։ Սովորել է Թիֆլիսի թիվ 43 դպրոցում: 1950 թվականին ավարտել է Մոսկվայի պետական համալսարանի փիլիսոփայության ֆակուլտետը։ 1950-1956 թվականներին եղել է Մարքսիզմ-լենինիզմի ինստիտուտի հայկական մասնաճյուղի գիտաշխատող, 1955-1971 թվականներին ընդհատումներով՝ ԵՊՀ փիլիսոփայության ամբիոնի դոցենտ, 1956-1958 թվականներին՝ «Կոմունիստ» թերթի ագիտացիայի և պրոպագանդայի բաժնի վարիչ, 1958-1969 թվականներին՝ ՀԽՍՀ ԳԱ փիլիսոփայության և իրավունքի սեկտորի գիտաշխատող։

1953 թվականին Մոսկվայի համալսարանում պաշտպանել է թեկնածուական, 1968 թվականին՝ դոկտորական ատենախոսություն: 1955 թվականին նրան շնորհվել է դոցենտի, 1971 թվականին՝ պրոֆեսորի կոչում:

1969-1970 թվականներին աշխատել է ԵՊՀ փիլիսոփայության, իսկ 1970-1976 թվականներին՝ դիալեկտիկական մատերիալիզմի և տրամաբանության ամբիոնում: 1976-1978 թվականներին եղել է ԵրՊԻ փիլիսոփայության ամբիոնի պրոֆեսոր, 1978-1987 թվականներին՝ մարքսիզմ-լենինիզմի ինստիտուտի հայկական մասնաճյուղի տնօրենի տեղակալ, 1987-2008 թվականներին՝ ԵՊՀ դիալեկտիկական մատերիալիզմի և տրամաբանության ամբիոնի պրոֆեսոր: 2008 թվականին անցել է կենսաթոշակի:

Հեղինակ է 67 հոդվածի, 14 մենագրության:

Զբաղվել է դիալեկտիկական մատերիալիզմի իմացության տեսության հարցերով։ Աշխատությունները վերաբերվում են տեսական փիլիսոփայության և փիլիսոփայության պատմության հարցերին։

Մեծ ներդրում ունի Իմանուել Կանտի աշխատությունների հայերեն թարգմանության և մեկնաբանման գործում:

Նրա ղեկավարությամբ պաշտպանվել է 4 ատենախոսություն:

• Гносеологические проблемы теории знаков, Е., 1965.
• Кант и проблема знания, Е., 1979.
• Главный труд Канта, Е., 1981.
• Лекции по философии, Е., 1996.
• Письмо о моралистах прошлого, Е., 2001.
• О филисофских проблемах знаковой теории языка, Е., 2001.
• Термины философии И. Канта: Словарь. Тигран Мец, 2003 - Всего страниц: 36.
• Другой Кант, Полигнозис, М., 2004.
• Беседы о классической филисофии, Е., 2006.
• Понять филисофа, Е., 2006.
• Նամակներ մեծ բարոյախոսների մասին, Ե., 2007:
• Тетрадь Sigma. Размышления на философские темы, Е., 2008.