Leo Demetz

Articul per Ladin Gherdëina

Leo Demetz, nce Leo Demetz dl Academia (*28 de juni 1885 a Urtijëi; † 29 de dezëmber 1960 a Urtijëi), fova n njenier y mprenditëur de Urtijëi.

Biografia

Leo Demetz ie nasciù sciche ultim de 14 mutans y mutons de Mariana Demetz de Sodlieja y Ferdinand Demetz. L ie sta tlamà Leo do l papa Leo XIII. Si plu vedla sor Carlina fova la loma de Luis Trenker. Do la scoles a Urtijëi iel jit a Bulsan tl Josefinum (1896-1898). Dal 1899 al 1902 al fat la scola "Bau- und Kunsthandwerkerschule" a Bulsan, depona a Berlin (1905-1911) ulache l ie deventà njenier.

A Berlin al cunesciù Isolde von Pohl na fiocia de Richard Wagner y da chësta al giatà doi mutans Senta y Johanna (Hansi). Ntan che Leo Demetz à messù jì tla viera (1914-1918) ie si fëna morta. De reviers dala viera se al maridà cun Matilde Stuflesser fia de Ferdinand Stuflesser de Petlin y i à abù cin mutans y doi mutons: Mathilde (Tilda), Isolde (Loldi), Annamaria, Stefania (Fanny) y Margherita. I doi mutons fova: Ferdinand (mort do la nasciuda) y Leo che ie mort tla segonda viëra sciche pilot.

Adum cun si mut Leo al fat la scola de julé tl 1939 y ie pona stat l prim pilot te Gherdëina. L ie nce stat un di primes a avëi n auto n motor y n telefon.

Leo Demetz ie stat l prim presidënt dla Lia per l guant dala Gherdëina tl 1919.

Ai 5 de mei di 1920, su scumenciadiva de Leo Demetz, ie stata sul jëuf de Frea n protest che i ladins nen ie nia unic numinei tl tratat de pesc do la gran viera. Tl 1945 ie Leo Demetz adum cun Franz Prugger y Luis Trenker promotëur per la lia Union di Ladins de Gherdëina y l ie stat l prim vizepresidënt dla union dal 1946 al 1947.

Leo Demetz ie nce stat ciaciadëur y presidënt dla ciaces de Sëlva y Santa Cristina ti ani 1955.

Leo Demetz à judà adum cun Giuani Stuflesser de Petlin a derturé la capela de Resciesa tl 1957.

Ativiteies de cumerz

Ti ani 20 a Leo Demetz scumencià a vënder cëses prefrabichedes.

Tl ann 1926 à Leo Demetz metù su na nueva fujina da la lectrisc n pue dedora da Puntives a man ciancia dl ruf. L à nce svilupà n sistem de desdlacé la roles dl ega cun la lectrisc.

Daujin a si cësa a Urtijëi al zidlà foreles per i hotiei de Gherdëina.

Mplanc portamont

Tl 1934-1935 ie stac fac i lëures per la furnadoia de Mont de Sëuc . Leo Demetz fova pra i fundadëures dla sozietà y l presidënt tl 1934.

Sun Mont de Sëuc sun Cherta ie sta metù su n schilift tl 1938 che fova dant sun Ronc y pona sun Resciesa. Chësc lift univa tlamà "Leo Demetz" y plu tert "Fannylift".

Tl 1950 ie unì metù su da Leo Demetz, Luis Trenker y d’autri la sozietà ”Sessellift Raschötz GmbH” per fabriché n lift dai stuei da Urtijëi sun Resciesa. D’ansciuda dl 1952 à chësc scumencià a ji.

Scric

• Bera Giuani Stuflesser de Petlin. Calënder de Gherdëina 1959, pl. 29-31.