![](https://pplstatic.nyc3.cdn.digitaloceanspaces.com/static/images/dummy-gradient.jpg)
Quick Facts
Biography
Kristian Hermann Berg (18. april 1894–21. januar 1961) var ein norsk fiskar, småbrukar, samvirkekonsulent og politikar frå Gamvik i Sørøysund i Finnmark. I tida 1928 til 1945 var han 1. representant på Stortinget frå Finnmark, vald for Arbeidarpartiet.
Berg var i 1911 elev ved amtsskolen i Alta 1911. Der etter var han fiskar og skipper, og dreiv mellom anna håkjerringfiske til havs på eiga fiskeskøyte frå 1917. Sidan 1918 eigde og dreiv han småbruket Hønsebyvik i Sørøysund. Frå mai 1938 arbeidde han som statleg konsulent i fiskarsamvirket i Nord-Noreg.
Berg var ei drivande kraft i organiseringa av fiskerinæringa i Vest-Finnmark. I 1920 var han med å stifte Sandøbottens Fiskerforening, formann i laget i tre år. To år etter var han mellom stiftarane av Vest-Finmarkens gjensidige låneforretning og var 1923-28 forretningsførar for selskapet. Og i 1930 var han med å stifte Finnmarks fiskerforbund.
Åra 1924-27 var Berg likningssekretær i Sørøysund. Han gjekk då i 1928 over til å vere ordførar i Sørøysund, ein posisjon han hadde til 1937. Samstundes vart han i 1928 stortingsmann for Arbeidarpartiet og Finnmark, attvald både i 1930, 1933 og 1936. På Tinget var han 1928-30 medlem i Næringskomite nr 1 og frå 1931 i Sjøfarts- og fiskerikomiteen.
Attåt stortingsarbeidet var Berg medlem i Komiteen om fiskeridistriktenes vanskeligheter av 1932 og i Råfiskkomiteen av 1937, formann i Komiteen om fiskerienes tryggingsfond av 1938, medlem i Fiskeværkomiteen av 1947 og i Komiteen om eigedomsretten til fiskefartøy av 1948.
Under okkupasjonen av Noreg vart han arrestert 26. juni 1942. Sidan sat han i fangeleirane Sydspissen, Veidalen og Tromsdalen til vinteren 1943. Der etter var han innom leirane Vollan og Grini, før han enda opp i Sachsenhausen. Etter knappe to år i Sachsenhausen sat han ei tid i Neuengamme og 12 døgn i ein fangeleir i Danmark. 2. mai 1945 kom han til Sverige.