![](https://pplstatic.nyc3.cdn.digitaloceanspaces.com/static/images/dummy-gradient.jpg)
Quick Facts
Biography
Knut Larsson Uksnøy (15. januar 1882–25. mars 1960) var fiskar, organisasjonsmann og politikar. Han var fødd på Uksnøya som då låg i Haram på Sunnmøre, seinare overflytta til Sandøy i Romsdal. Han tok til som fiskar 15 år gamal, og vart skipper på eigen båt då han var 22.
Knut Uksnøy vart med i Harøens Fiskeriforening i 1898. Han var pådrivar ved skipinga av Sunnmøre og Romsdal Fiskerforening i 1915. Like eins gjekk han sterkt inn for skiping av Norges Fiskarlag i 1926. I ein avisartikkel i februar 1927, skisserte han korleis omsetninga av storsild burde organiserast. Ideane hans låg til grunn då Storsildlaget vart skipa seinare same året. Her sat han i styret frå starten og til 1933. 1944–1945 var han formann i Sunnmøre Fiskarlag.
Under 2. verdskrigen freista NS å få kontroll over Norges Fiskarlag. Det lukkast ikkje. Sidan Knut Uksnøy var kritisk til leiinga i fiskarlaget i andre saker tok NS utsegnene hans til fordel for seg. Det var det ikkje grunnlag for. Likevel førte det til at Knut Uksnøy vart suspendert frå Norges Fiskarlag på landsmøtet i 1945. Ei medårsak til suspensjonen kan ha vore at Sunnmøre Fiskarlag, der han var formann, låg i strid med Norges fiskarlag om organiseringa av fiskeriomsetninga. Uksnøy gjekk til rettssak mot fiskarlaget. Han fekk medhald i Trondheims byrett i 1948. Etter at partane inngjekk forlik, var suspensjonen oppheva og Knut Uksnøy fekk erstatning. I 1953 vart han utnemnd til æresmedlem i Norges Fiskarlag.
Knut Uksnøy skreiv manusskriftet til fiskarfilmen Ut mot havet, som var ferdig i 1955. Han leidde arbeidet med utgjevinga av Fallboka for Møre og Romsdal, som Sunnmøre fiskarlag gav ut i 1959. Uksnøy stod på førsteplass på lista til Aktive Fiskarar ved Stortingsvalet i 1936. Ved Stortingsvalet i 1945 vart han 1. vara representant for Bondepartiet i Møre og Romsdal. Han møtte og på Stortinget ei kortare tid.
Knut Uksnøy fekk Kongens fortenestmedalje i gull i 1959.
Kjelder
- Harald Kjølås:Fiskarhøvdingen i 100 år 100 navn Personer som har preget hundreåret på nordvestlandet Sunnmørsposten Forlag 2000
- Pål Christensen og Abraham Hallenstvedt: I kamp om havets verdier. Norges Fiskarlags historie. Norges Fiskarlag 2005
- stortinget.no