Kamil Akimov

Kamil Əlisoltan oğlu Akimov (d.11 iyul 1927, Sabirabad ş. - v.19 iyun 2019, Bakı ş.) – ictimai xadim, neft sənayesi təşkilatçısı, Azərbaycan Respublikasının "Əməkdar Mühəndis"i.

Kamil Akimov 1927-ci il iyulun 11-də Sabirabad şəhərində sənətkar ailəsində anadan olub. 1943-cü ildə Bakı Neft Texnikumuna daxil olmuş, 1947-ci ildə bu texnikumu fərqlənmə diplomu ilə bitirdikdən sonra təhsilini Azərbaycan Sənaye İnstitutunda davam etdirib və eyni zamanda Neftayırma zavodunda operator köməkçisi kimi əmək fəaliyyətinə başlayıb. 1952-ci ildə ali təhsilini neft və qazın emalı üzrə mühəndis-texnoloq ixtisası ilə başa vurduqdan sonra zavodun ən məhsuldar qurğularından birinə rəis təyin edilib.

• Kamil Akimov, 1962-ci ildə zavodun baş mühəndisini müavini;
• 1963-cü ildə Azərbaycan KP MK, respublika Nazirlər Soveti yanından yeni təşkil olunmuş Partiya Dövlət Nəzarət Komitəsinin neft və kimya sənayesi şöbəsinə rəis müavini;
• 1964-1967-ci illərdə Bakı Neft Emalı Zavodunun direktoru;
• 1967-1970-ci illərdə Azərbaycan SSR Neft Emalı Sənayesi nazirinin birinci müavini;
• 1970-1980-ci illərdə Azərbaycan SSR Neft Emalı Sənayesi naziri vəzifələrində çalışmışdır.
• 1980-ci ildə II çağırışda Ali Sovetin deputatı seçilib.

O, ayrı-ayrı illərdə İraqda və Kubada neft emalı zavodlarının yenidən qurulmasında sovet mühəndislərinin işinə birbaşa rəhbərlik edib, həmin ölkələrin fəxri fərmanları və yüksək mükafatlarına layiq görülüb.

• "Şərəf Nişanı" ordeni
• "Oktyabr İnqilabı" ordeni
• "Qırmızı Əmək Bayrağı" ordeni
• Azərbaycan respublikası Ali Sovetinin Fəxri Fərmanı ilə təltif edilib.

2019-cu il iyunun 19-da Bakı şəhərində vəfat etmişdir.