Jules Pirot

Jules-Joseph Pirot, ki s' no d' pene, c' esteut Porti, on ricmaxhaedje des letes di s' no , c' est on scrijheu e walon. I skepia a Djeve e 1877 et mora a Esterhazy (Canada) (ki s' loméve, di ç' tins la, Kaposvar) e 1955. Il est eteré dilé l' eglijhe ki les maçons d' Djeve avént basti e 1907. 

Di s' mestî, il esteut curé, ey il ebaga eviè l' Canada e 1903.

Il a scrît tot djonne, cwand il esteut co å Ptit Seminaire di Florefe, ene pitite novele : "N' avoz nén veyou nos pourceas ?"

Divant d' endaler å Canada, i fwait parexhe on live di sovnances, mins k' i rarindje a môde literaire. Si tite, c' est Les fåves da nosse viye mere. C' est aprume des racontroûles di doûcès croeyances do vî tins.

Il est onk des råles escrijheus e walon k' åye sicrît sol payis la k' il aveut abagué : li Sascatchewane e miercorin do Canada.

Ses scrijhaedjes e walon ki s' passèt e Canada ont stî rashonnés dins on live Contes d' å lon et did près eplaidî e 1950.

I raconte des sacwès ki s' ont passé podbon ey eto des floricontes des djins did låvå, inte di zels, li ci di l' Aiwe Qu'Appelle.

E Canada, Pirot aprinda sacwants lingaedjes etrindjirs, emey zels, li hongrwès, pask' il a stî curé lontins a Esterhazy la k' gn aveut des cåkêyes di Hongrwès. Il a minme sicrît on catrecime e hongue.

Lucien Léonard a-st eplaidî on live sor lu "Un littérateur wallon du Canada, l'abbé J.-J. Pirot" (sins leu, sins date, diviè 1967).

Riprins dins l' grosse Antolodjeye da Piron.

Alére

Hårdêye difoûtrinne

Sourdants