Juanita Ibaibarriaga

Juanita Ibaibarriaga Uriarte (Ermua, Bizkaia, 1934ko martxoaren 30a – 1992ko otsailaren 9a) euskaltzalea eta ekintzailea izan zen. Haren omenez, Ermuko Udaleko Euskara Sailak Juanita Ibaibarriaga Literatur Saria sortu zuen 1992an.

Juanita Ibaibarriaga Ermuko Iturriaganeko etxean jaio zen. Autodidakta eta irakurle amorratua. Bere inguruan gertatzen zenaz jantzita egotea gustatzen zitzaion emakumea izan zen.

Lanak

Beste zenbait gurasorekin batera, Ermuko familia elkartean, Anaitasuna ikastola aurrera ateratzeko borroka egin zuen. Bere seme-alabei etxerako lanak egiten lagunduz, euskaraz irakurtzen eta idazten zaletu zen; eta, haiek koskortu zirenean, lan sozialak egiten ere hasi zen. Juanitak herriko Euskal Birusa Elkarte Kulturalaren sorreran parte hartu zuen, Ermuko hizkuntza, ohiturak eta abestiak berreskuratzen.

Drogetenitturri herri aldizkariko hasierako zenbakietan kolaboratzaile jardun zuen.

Literatur lehiaketa

Ermuko Udaleko Euskara Sailak, ikasleen artean euskaraz idazteko zaletasuna sustatzeko asmoz, literatur lehiaketa bat antolatzea erabaki zuen. Lehiaketari izena jartzeko hainbat proposamen egon ziren; denen artean, Juanita Ibaibarriagarena nagusitu zen. Hortaz, 1992. urtean, Juanita Ibaibarriaga Literatur Saria sortu zuen. Geroztik, urtero antolatu du lehiaketa. Sari banaketa Ermua Antzokian egiten da, Euskararen Nazioarteko Eguna ospatzeko antolatzen den ekitaldian.

Herrian euskararen alde lan handia egin zuen Juanita Ibaibarriagaren omenez gazte zein helduentzako literatur sari hau ospatzen da. Sari honen helburua herritarren artean euskaraz idazteko zaletasuna piztea da. Horretarako modalitate bi sortu dira, batean Lehen Hezkuntza hiru, lau, bost eta seiko ikasleentzat eta bigarren modalitatea 16 urtetik gorako ikasleentzat.

• Juanita Ibaibarriaga lehiaketaren oinarriak
• Juanita Ermuko argazki albumean
• Auñamendi 40057-124338/