José Menéndez Carreño

José Menéndez Carreño, Cuchichi, (Uviéu, 12 d'agostu de 1890, 3 d'avientu de 1978), foi un cantante asturianu de tonada.

Entamó a cantar siendo mozu y en 1905, con quince años, ingresó na Agrupación Coral e Instrumental Ovetense que más sero pasaría llamase Orfeón Ovetense. Nel añu 1914 foi escoyíu pol musicólogu Eduardo Martínez Torner pa ilustrar una riestra de conferencies-conciertu na Universidá d'Uviéu sobre la música popular d'Asturies, repitiendo la esperiencia l'añu siguiente, nesta ocasión acompañáu pola so fía Faustina.

Nel Orfeón Ovetense coincidiría con José María Martínez Suárez, Botón (cantante), col que formaría un dúu que viaxaríen per Cuba y Florida nel añu 1917 de la mano d'Eduardo Martínez Torner. En 1918 grabó en L'Habana el so primer discu cola compañía La Voz de su Amo. Volveríen Cuchichi y la so fía a tierres cubanes y mexicanes en 1924, nuevamente ilustrando les conferencies de Torner.

A la vuelta d'esti viaxe per tierres americanes la directiva del Orfeón entama un conciertu-homenaxe que sería'l guañu del que naceríen Los Cuatro Ases, el cuartetu que formaríen Cuchichi, Botón, Miranda y Claverol. El cuartetu caltendría la so actividá ente los años 1920 y 1941, añu nel que morrería Botón lo que llevó a la disolución del cuartetu.

Cuchichi formaría parte de los xuraos de bien de concursos de tonada, siendo integrante del primeru entamáu pol diariu Región.

D'ente los cantares que dexó grabaos destaquen Soi asturianín, Los mineros del Fondón, o A la pipiona.

Crónica de la Tonada Asturiana