Johann Wehle

Jan Wjela (němsce Johann Wehle; * 14. januara 1737 w Konjecach pola Kubšic, † 10. januara 1793 w Chrjebi) bě serbski ewangelski farar w Dołhej Boršći a Chrjebi a nan molerja Hendricha Božidara Wjele.

Po zakónčenju Budyskeho gymnazija studowaše wot lěta 1756 we Wittenbergu ewangelsku teologiju a bě čłon tamnišeho serbskeho předarskeho towarstwa. Farske městno w Dołhej Boršći nastupi 1766. W lěće 1768 woženi so z Rahel Doroteju, rodźenej Rieschkec, ze Schlaurotha pola Zhorjelca. Wot lěta 1782 skutkowaše jako farar w bliskej Chrjebi. Jeho kuzenk ze samsnym mjenom bě z fararjom w Křišowje a zmandźeleny ze staršej sotru Rahel Wjelineje, Rosinu Christianu.

Wjela spisa někotre nowe spěwy za ewangelske serbske Spěwarske a zeserbšći tež wjacore němske kěrluše.

• Otto, Gottlieb Friedrich: Lexikon der Oberlausitzischen Schriftsteller und Künstler, třeći zwjazk, str. 475

1. ↑ po napisu při narownym pomniku („Canitz bey Budißin“); po druhich žórłach w Kumšicach
2. ↑ po napisu při narownym pomniku Rahel Wjelineje w Chrjebi
3. ↑ Lausitzisches Magazin 1/1768, str. 266