Jean-Georges Quiquerez

Dr Jean-Georges Quiquerez, wo am 28. Augschte 1755 z Grandfontaine uf d Wält choo und am 29. April 1832 z Saugere gstoorben isch, isch e Schwiizer Notaar und Staatsbeamte gsi.

Si Vatter isch dr Joseph Quiquerez und syni Muetter d Françoise geboreni Fridez gsi. Dr Jean-Georges Quiquerez isch im Basel-fürschtbischöfliche Staat Notaar woorde. Er het i dr Staatsverwaltig vom Fürschtbischtum als Schaffner und Hoofchammerroot gschaffet.

Wo em letschte Basler Fürschtbischof sys Land nach dr französische Revoluzioon zu Frankrych choo und döört s Departemänt Mont-Terrible woorden isch, het dr Quiquerez als Presidänt d Versammlig vo de Wahllüüt i dere Regioon gleitet. Anne 1800 isch er Bürgermeischter vo Pruntrut woorde. Er het sich für modäärni Sache ygsetzt, so isch er öppe für s nöie metrische Sischteem gsi und het en Kataschter vom Grundbsitz i dr Stadt plaanet. 1807 het er uf Druck vom französische Inneminischter vom Amt als Bürgermeischter müesse zruggträtte.

Dr Jean-Georges Quiquerez isch i dr Gschicht vo dr Sproochforschig bekannt, wil er em jurassische Pfaarer Ferdinand Raspieler sys Mundartwörterbuech Dictionnaire patois, s eerschte Lexikon vom Grafschäftlerischen im Dialäkt vom Schwiizer Jura, wyter gschriben und ergänzt het.

• Jean-Georges Quiquerez: Dictionnaire ou explication en français, quelques fois en Latin et en allemand, des termes patois les plus singuliers en usage dans la vallée de Delémont et dans le païs d’Ajoye, (überarbeiteti Fassig vom Ferdinand Raspieler sym Dictionnaire patois). Bibliothèque cantonale jurassienne, Pruntrut, Signatuur MP 45 / A6095 (Digitalisaat uf e-codices.ch).

• André Bandelier: Jean-Georges Quiquerez In: Historisches Lexikon vo dr Schwiiz.
• Pierre Henry: Les glossaires jurassiens. Lexicographie patoise. Ferdinand Raspieler – Jean-Georges Quiquerez – Antoine Biétry – François Fridelance – François-Joseph Guélat – Simon Vatré – Robert Jolidon. 1992.