Jacobus van der Riet

Jacobus van der Riet (gebore in 1959) is 'n Afrikaanse digter en priester van die Oosters-Ortodokse Kerk.

Van der Riet is in 1959 in Stellenbosch gebore, waar hy, na kort tydperke in Wellington en Harrismith, skoolgegaan en universiteit bygewoon het. In die 1980's verwerf hy grade in Klassieke Studies en Teologie. Hy verwerf in 1999 ook 'n Ph.D. aan die Universiteit van die Witwatersrand in Klassieke Studies. Sy werk hiervoor handel oor die Romeinse en Griekse poësie. Hy verwerf in 1999 ook 'n meestersgraad in teologie aan die St. Tikhon's Orthodox Theological Seminary in Pennsylvanië. In 2012 verwerf hy 'n diploma in Biblioteekkunde aan die Universiteit van Kaapstad.

Hy is in 1994 in die Ortodokse Kerk van die Heilige Nikolaas van Japan aanvaar. Marica Frank, sy destydse kollega aan die Universiteit van die Witwatersrand, het hom uitgenooi om dienste by St Nicholas by te woon, en sodoende het hy geleidelik die Ortodokse geloof en lewenswyse leer waardeer en aanvaar.

In 2001 woon hy in 'n klooster in die Peloponnesos ten einde Grieks, Bisantynse sang en ikonografie ten dele te probeer aanleer. Hy word in 2002 tot diaken en kort daarna deur aartsbiskop Seraphim tot priester georden. Enkele jare later is hy verhef tot die rang van archimandriet.

Hy dien aanvanklik vir agtien maande by die die Heilige George/Joris Ortodokse Kerk in Brakpan en dien sedert 2004 in die kapel van die Heilige Konstantyn en Helena in Eldorado Park (laasgenoemde gemeente is 'n dogterkerk van die St. Nicholas of Japan gemeente). Hy het later ook twintig maande gedien by die Heilige Basilios Ortodokse Kerk in Springs. Vanaf die einde van 2011 word sy bediening by Eldorado Park gekombineer met sy bediening by die Ortodokse Kerk van die Ontslaping van die Hoogheilige Theotokos in Rustenburg.

In 2013 is hy (saam met Vr. Zacharias van Wyk) deur die Federasie van Afrikaanse Kultuurverenigings (FAK) vereer vir sy werk om die Ortodokse liturgiese tekste uit Grieks in Afrikaans te vertaal.

Werke

Die onsienlike son bevat 'n vyftigtal sonnette wat uitsluitlik oor heiliges handel en in dié opsig aansluit by die digkuns van Sheila Cussons. Die verse is religieuse meditasies oor die lewe en werk van heiliges.

Die heimlike heiligdom bevat 'n vyftigtal bepeinsende sonnette oor heiliges wat deur die Oosters-Ortodokse Kerk gekanoniseer is, sowel as bykomende biografiese aantekeninge wat inligting oor die meer onbekende heiliges verskaf. Hierdie publikasie sluit wat inhoud en vorm betref dus nouliks aan by Die onsienlike son, en die twee bundels kan dus gesien word as 'n eenheid wat saam klem plaas op ritualistiese en meditatiewe gemeenskap met heiliges.

Publikasies

• Die onsienlike son (Protea Boekhuis, 2012)
• Die heimlike heiligdom (Protea Boekhuis, 2020)

Verwysings