Ilgar Baylarov

İlqar Xıdır oğlu Bəylərov (31 iyul 1961, Laçın) — azərbaycanlı memar, Azərbaycan Respublikasının əməkdar memarı, Azərbaycan Memarlar İttifaqı İdarə Heyətinin katibi, "IBA GROUP" memarlıq şirkətinin baş direktoru.

İlqar Xıdır oğlu Bəylərov 31 iyul 1961-ci ildə Laçın şəhərində anadan olmuşdur.

1983-cü ildə Azərbaycan İnşaat Mühəndisləri institutunu bitirmişdir. 1983–1988-ci illərdə Bakı Baş Tikinti İdarəsində, sonra SSRİ Elmlər Akademiyasında işləmişdir.

1993–1998-ci illərdə "Asia Plus", 1998–2012-ci illərdə "ATTİLA KM"də direktor vəzifəsində çalışmışdır. Hal-hazırda "İBA GROUP LLC" memarlıq şirkətinin direktorudur.

İlqar Bəylərovun layihələri əsasında Bakıda "Debüt Bank"ın inzibatı binası, "Altes Park", "Altes Plaza", "Sun City" , Bakı Sağlamlıq Mərkəzi, Elmlər Akademiyasının Mərkəzi Kitabxanası, TOP TAUN yaşayış binası, "PALİTRA" yaşayış kompleksi, 8-ci km -də Çoxmərtəbəli Avtomobil Dayanacağı və bir çox başqa çoxmərtəbəli yaşayış evləri, Qazax, Bərdə, Zaqatala, Gəncə, Tovuz, Dəvəçi, Xızı, Daşkəsən, Yevlax, Ağcabədi, Qəbələ, Şuşa, Jəbrayıl, Şəmkir rayonlarında müalicə-diaqnostika mərkəzləri, və xəstəxanalar, sağlamlıq kompleksləri və reabilitasiya mərkəzləri tikilmişdir.

İlqar Bəylərov, 2008-ci ildə "Ustad Memar" sertifikatına, 2012-ci ildə Azərbaycan Respublikasının əməkdar memarı fəxri adına layiq görülmüşdür.

1985-ci ildən Azərbaycan Memarlar İttifaqının üzvüdür.

2007-ci ildən Azərbaycan Memarlar İttifaqı İdarə Heyətinin katibidir.

20 dekabr 2017-ci ildə Azərbaycanda memarlığın inkişafında xidmətinə görə, Prezident İlham Əliyevin sərəncamı ilə "Şöhrət" ordeni ilə təltif olunub.

22 fevral 2017 Beynəlxalq Memarlıq Akademiyasının professorudur.

Ailəsi

• Laçın rayonunun ictimai-siyasi xadimi Xıdır Bəylərovun oğludur.