Heiner Studer

De Heiner Studer isch z Wettige ufgwachse un läbt au hüt no derte. Im Johr 1969 het er d Handelsmatur gmacht un het sich brueflich vo Aafang a in eme politische Umfeld bewägt. So isch er 1970 Zentralsekretär vo de EVP worde un 1976 Zentralsekretär vom Schwiizerische Verband vo de evangelische Arbeitnehmerinne un Arbeitnehmer. Im Johr 1984 het er s Sekretariat vom Blaue Chrüz vo de dütsche Schwiiz übernoh un vo 1984 bis 2001 isch er bim Blaue Chrüz Zentralsekretär un Gschäftsführer gsi.

Er hat au immer politischi Ämter übernoh, so isch er vo 1973 bis 1998 im Grosse Rot vom Kanton Aargau gsi. Im Johr 1997 isch de Heiner Studer mit 48 de jüngschti Alterspräsident (Dienschtälteschti) i de Gschicht vom Parlament gsi. Gliichzitig mit sim Grossrotsmandat isch er vo 1974 bis 1985 im Iiwohnerrat (Legislative) vo sinere Heimat- un Wohngmeind Wettige gsi. Vo 1986 bis 2013 isch er z Wettige Gmeindrot (Exekutive) gsi, doderbi vo 1994 bis 2013 Vizeammaa. In de Nationalrot isch de Heiner Studer 1999 gwählt worde, wo er de ussepolitische Kommission un de Kommission für Wissenschaft, Bildig un Kultur aghört het. 2007 isch er nüm gwählt worde und eis Johr spöter, 2008, het er s Präsidium vo de EVP vo de Schwiiz übernoh, wo er im April 2014 an d Marianne Streiff abgeh het.

De Heiner Studer isch in ere methodistische Familie ufgwachse un isch derte Laienprediger. Aber au i de Landes-Chile isch er Mitgliid. Er isch Präsident vo der Chilepfläg vo de reformiirte Chilegmeind Wettige-Noiehof gsi un leitet zur Zit im Uftrag vom Aargauische Chilerot di reformiirte Chilegmeinde Zorzach und Gauestei als Kurator.

Im Frühjoht 2009 isch vo ihm es Buech über sini Erfahrige als Nationalrot z Bärn erschine.

De Heiner Studer isch mit ere gebürtige Norwegerin ghürate un het drei erwachseni Töchtere. Sini Tochter, d Lilian Studer (* 1977), isch sit 2002 Grossrötin im Aargau un vo 2004 bis 2009 Präsidentin vo de Junge EVP gsi.

• Auch Politiker sind Menschen. Aus dem zwischenmenschlichen Alltag im Bundeshaus. Blaukreuz-Verlag Bern 2009, ISBN 978-3-85580-463-4.

• Website vom Heiner Studer
• Es Porträt us de Aargauer Zitig vom 24. September 2003
• Heiner Studer uf dr Websyte vo dr Bundesversammlig (Iigreichti Vorstöss)
• Politprofil Heiner Studer (Abstimmigsverhalte im Nationalrat, 46. Legislatur)