Euphaes

De Euphaes (altgriech. Εὐφάης) isch de messenische König vo 745 bis 732 v. Chr. gsii, usem Gschlecht vo de Aipytide. Er isch de Noofolger vo sim Vatter Antiochos. Underem Euphaes isch de Erst Messenisch Chrieg uusbroche.

Ane 743 v. Chr. hend d Spartaner underem König Alkamenes, em Soo vom Teleklos, di messenischi Bergstadt Ampheia iignoo, wo a de Grenze zu Sparta glegen isch. Si hend d Iiwonner vo dere Stadt töödt und vo do uus Öberfäll i die messenischi Ebni gmacht. De Euphaes hett zom Chrieg grüstet und ane 739 v. Chr. isch di erst Schlacht zwöschet de Messenier und Spartaner gschlage wore. Zwoor hett de Euphaes e Joor druf a de Spartaner e Niderlaag zuegfügt, hett aber trotzdem di ungschütze Stedt ruume loo, demit sich d Biwonner am Berg Ithome asidle tüend, wo scho e chliis Städtli gsii isch, woner uusbaut hett und gröösseri Muure baue loo hett. Ane 732 v. Chr. het de spartanischi König Theopompos d Festig a de Ithome agriffe und de Euphaes isch im Champf umchoo. Well er ka Söö ghaa hett, isch de Aipytid Aristodemos zu siim Noofolger gwäält wore.

D Historizität vo de literarisch uusgschmückte Ereignis werd vo de Forschig kritisch biwertet und d Jooresaagoobe bim Pausanias wered as faltsch aglueget, und söttet öppe 40 Joor spööter agesetzt were.

• Pausanias, Raise z Griecheland 4.5.8-4.10.5

• Nino Luraghi: The Ancient Messenians: Constructions of Ethnicity and Memory. Cambridge University Press, Cambridge/ New York 2008, ISBN 978-0-521-85587-7. S. 96f.