Quick Facts
SagittariusBiography
D Emma Paolini (* 18. Dezämber 1906 z Wyyl as Emma Garnin; 2. April 2004) isch e dytschi Haimetdiichteri gsii.
Lääbe
D Paolini isch am 18. Dezämber 1906 im „Dalbeloch“ am Mühlirai z Altwyyl as Doochter vun eme Yysebaahner uf d Wält chuu. Vu irem Vater het si d Musikalideet gerbt un d Liebi zue dr Dierer. No dr Schuel het si in dr Wyyler Uhrefabrik Schätzle gschafft. Scho ase jung isch si ne begaischtereti Duurneri gsii. Si isch as Maidli uf Berlin uf di dytsch Duurnschuel gange. Si isch derno wider retuur chuu uf Wyyl un deert ire Läbdig bliibe. Iber s Duurne het si dr Löörecher Gipser-Polier Albert Paolini chännegleert. Si hän si baidi derno engaschiert im Duurnverain z Wyyl as Dreener. Anne 1930 hän si ghyroote un hän nocherdani in dr Hinterdorfstroß gwohnt. S Huus, wu si din gwohnt hän, isch friejer z Baasel gstande un het anne 1911 em Böu vum Baadische Bahnhoof mieße wyyche. S isch druf z Wyyl original wider ufböue woore. D Paolini un ire Mann hän zäme ne Suhn ghaa, wu anne 1973 mit 18 Johr bi me Verchehrsuufall verunglickt isch. Au ire Mann isch 1973 gstoorbe.
Si het scho mit 19 Johr aafange schryybe, no däne schwääre Schicksaalsschleeg het si grooße Drooscht gfunde im Schryybe. Si het Gediicht un Anekdoote gschriibe, iber s Lääbe un si sälber, un wie si Wyyl im Lauf vu dr Zyt veränderet het. In eme Chefferli het si ire Lääbe ufbhalte, alti Schuelheft, Notizbleck, loosi Bletter, vergilbti Boschtchaarte un Foto. Si het uf Dytsch un au uf Alemannisch gschriibe. In hoochem Alter isch si vu dr Muettersproch-Gsellschaft entdeckt woore un het anne 1998 e Uuswahl us ire Schrifte unter em Titel „Lebenserinnerungen“ bim Verleeger Friedrich Resin publiziert.
Dr Dokumentaarfilmer Dieter Zöbelin het in dr eerschte Folg vu dr Raie „Zeitzeugen“ d Paolini am 6. April 2002 gfilmt, wie si us irem Lääbe verzellt un e baar Gediicht voordrait.
Bis ins hooch Alter het si Gyyge, Gitarre un Zither gspiilt. Irem Lääbesmotto „Bi s’ ganz Läbe b’scheide bliebe, das bringt Rueh un im Herz d’r Friede“ isch si alliwyyl drei bliibe.
Am 2. April 2004 het d Emma Paolini im Alter vu 97 Johr d Auge fir immer zuegmacht. Dur iire Vermächtnis het dr Dierschutzverain us ere Nootuffangstazioon s „Emma-Paolini-Dierhaim“ im Sohleck chenne böue.
Wäärch
- Lebenserinnerungen. Von mir und meiner Heimat. Mit Illustrationen von Karlfrieder Elsner. Verlag Resin, Binzen 1998. 54 S. ISBN 3-923066-49-X
Weblink
- Aktiv auf vielen Ebenen. Emma Paolini feiert heute ihren 95. Geburtstag, Badische Zeitung, 18. Dezämber 2001
- Stets das „Altwiler Maidli“, Badische Zeitung, 7. April 2004
- Im Schreiben Trost und dann auch späte Anerkennung gefunden, Badische Zeitung, 16. Dezämber 2006
- Autoren aus Weil am Rhein: Emma Paolini uf weiler-kultur.de