Diana Antonette

E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

Diana Lydia Antonette (n. 9 di oktober 1945) ta un bailarina, coreografo y docente di baile Arubiano, renombra pa su contribucion na e arte di baile na Aruba.

Diana Antonette a crece na San Nicolas huntu cu su mayornan Catalina Lampe y Oscar Antonette y su dos ruman homber y su ruman muhe. Su tata tabata traha na refineria Lago. Rond di su di shete aña el a cuminsa tuma les di ballet na "Club Suriname" na San Nicolas y a crece cu pasion pa baile. Despues di caba scol secundario, Antonette tabata tin intencion di studia ley. Un dia, e director di Cas di Cultura a acerca Antonette su tata cu e posibilidad di un beca pa studia baile for di Sticusa. Antonette a tuma e beca aki ytabata e prome studiante di Aruba pa haya e beca aki for di e organisacion. Na 1968 e ta gradua den ballet na Rotterdamse Dansacademie (Codarts) y Balletstudio Nel Roos na Amsterdam como e prome bailarina profesional Arubiano. Durante su estudio na Hulanda, el a cera conoci cu diferente sorto di baile cu e no tabata familiar cune prome, manera flamenco y bailenan folclorico.

Antonette ta mama di e bailarinanan y docentenan di baile Alydia Wever y Pierangely Wever.

Antonette tabatin como bailarina un carera di 50 aña y ta activo ainda como docente y coreografo. Na 1968 el a cuminsa como docente di baile na Scol Arubano di Baile y Ballet. Na 1975 e ta lanta, hunto cu e bailarinanan Astrid Salazar y Ina Profet, e scol di ballet "Simandanza". Enfoke di e scol tabata e tradicionnan di baile folklorico Arubiano. Na 1983 e el a bin cu su propio grupo di baile "Teatro di Dansa Arubano" cu regularmente tabata duna show di baile tipico na Bonbini Festival den Fort Zoutman y na hotel Golden Tulip-Aruba Caribbean. E grupo tambe a haci gira na Colombia, Republika Dominikano, Venezuela y Merca. Despues di a regresa Scol Arubano di Baile y Ballet como docente e ta keda apunta dia prome di augustus 1984 como su director.

Antonette a funda Scol di Baile Diana Antonette, localisa na Cas di Cultura. Na su scol e ta ofrece diferente curso di baile (p.e. folclor, ballet, flamenco, streetdance) pa tur edad y nivel. Cu su studiantenan, e ta crea shownan regularmente. Antonette ta conoci pa e shownan di baile folclorico cu e ta coreografia regularmente pa dianan di fiesta.

El a ricibi diferente distincion pa su contribucion na arte na Aruba. Na 2019 el a wordo condecora como "Ridder" den Orden di Oranje-Nassau.