David McKoy

David Laurence McKoy (* 11. Februar 1929 in Stann Creek; † 2006) weer en belizeschen Politiker von de People’s United Party.

McKoy is 1929 as Söhn von Lottie Matilda, borene Blanco, un den Timmermann David N. McKoy in ene Garifuna-Familie in Stann Creek boren. He weer op de Stann Creek Methodist School un hett later Privaatünnerricht kregen. Tosätzlich hett he Kurse an de Universitäten Harvard un Michigan State besöcht.

McKoy weer verheiraadt un harr twölv Kinner. He is in Belmopan begraven.

He weer toeerst in de General Workers’ Union (GWU) aktiv. Von de GWU hett he sik aver 1961 loosseggt un tohoop mit Nicholas Pollard de Southern Christian Union grünnt.

Bi de Parlamentswahl in Brietsch-Honduras 1957 is he in’n Wahlkreis Stann Creek mit 57,0 % von de Stimmen in de Legislativversammlung wählt worrn. He weer Arbeidsminister un hett ünner annern den Soziaalversekerungsfonds von Belize opboot. Later weer he Minister för soziale Entwicklung un Local Government.

Bi de Wahl 1961 is he in’n Wahlkreis Stann Creek Land antreden un hett 72,3 % von de Stimmen kregen. Bi de Wahlen 1964 (63,2 %), 1969 (65,0 %), 1974 (44,5 %), 1979 (49,9 %) un 1984 (39,6 %) is he in sien Wahlkreis jümmer wedderwählt worrn. He weer bet 1989 in de Politik aktiv.

1. ↑ David McKoy laid to rest, Channel 5 an’n 25. Mai 2006
2. ↑ Personalities Caribbean. Band 5, Personalities Limited, 1973, Sied 237