Daniel Wiroth

Den Daniel ("Dan") Wiroth, gebuer den 13. September 1969 an der Stad Lëtzebuerg, ass e lëtzebuergesche Filmregisseur, virun allem vun Animatiounsfilmer.

Den Dan Wiroth, deen aus enger Kënschtlerfamill kënnt, wiisst zu Lëtzebuerg an zu Bréissel op, a studéiert zu Bréissel op der Konschthéichschoul La Cambre Animatiounsfilm.

Wärend sengem Studium realiséiert e verschidde Kuerzfilmer: La révolte, Berlin 2017, Ombres méfiez-vous a Crucy-Fiction. Crucy-Fiction leeft 1995 um internationale Filmfestival vu Bréissel a kritt doruechter eng Dose Präisser.

1997 realiséiert e Fragile, eng belsch-lëtzebuergesch Coproductioun. Et ass en opwännege Stop-Motion-Animatiounsfilm, an deem Glieser a Fläschen an enger Bar 'lieweg' ginn.

1998 dréint en e Portrait vu sengem Papp, dem Sculpteur René Wiroth.

Era Mela Mela (2001) ass eng Mëschung aus Live- an Animatiounsfilm vum Dan Wiroth, déi um Festival vun Namouer presentéiert gouf.

2002 schafft e mam Peter Greenaway zesummen, fir den Tournage vun der Trilogie The Tulse Luper Suitcases z'organiséieren.

If not why not (2003), fir d'Tëlees-Chaîne Arte gedréint, ass eng gefilmt Mise en scène vum Choreograph Akram Khan a sengem Ensembel, déi e modernen Danz opféieren, dee sech um klasseschen indeschen Danz Kathak inspiréiert.

2004 dréint den Dan Wiroth de Kuerzfilm Elegant mam Denis Lavant a mam Thierry van Werveke.

Hie schafft fir RTL Télé Lëtzebuerg.

Den Daniel Wiroth krut de Lëtzebuerger Filmpräis 2003 als beschte Nowuess-Realisateur a fir de beschte Kuerzfilm (If not why not).

• Lëscht vu lëtzebuergesche Filmregisseuren