Bonafe

            [Bonafe]
            Seingn'En Blacatz, pos per tot vos faill barata
            e si clam a deu de vos gentz hermitana,
            tant es la riquesa grantz qu'a vos s'aplata,
            q'anc aiolz non sai mener maior ufana.
            Tant vos guerreion guerrer
            Que ves Alms fuion li archer,
            E non a ren al carner,
            On sol aver maint quarter.

            [Blacatz]
            Bonafe, de.ls huoilz de.l front non as escata,
            E.l pels es veilz e chanutz e sembla lana.
            Ben aia qui'us guirlanda sus de la pata
            Lai on intravaz emblar per la forana!
            Vos lor cuidez far paner,
            Mas ill en feron destrier,
            qe mort e regeta e fer,
            Ab Brunel l'albalester.

            [...]

            [Bonafe]
            Seigne.N Blacatz, qui re.us quier
            be.ill fan sofraicha dener,
            car viveç de caitiver
            mais d'un veill falcon lainer.

            [Blacatz]
            N'Orbacha, en vostre clocher
            Par que aia colunber
            O aion niat rater!
            Et eu sai donar, qui.m quer.

            [Bonafe]
            Seingn' En Blacatz, talant ai que vos queira
            de la terra don avetz tal sobreira
            e donatz me, si.us platz, vostra verqueira
            e l'omenesc d'en Guillem de Barreira,
            e puois er tan vostra proes' enteira
            que ben valretz en Raimon Oblacheira.

            [Blacatz]
            En Bonafe, qui.us fez de Voill saleira
            molt fo cortes, quar n'ostet la lumeira,
            e s'ab armas vos encontr'en carreira
            greu faillira que de'l pe non vos feira;
            qu'encontres d'orb ni de gent eschacheira
            no m'abellis quant desplec ma seigneira.

            [...]