Blas Mora

Blas Mora, naixito d'Albalat de l'Arcebispe (Baixo Martín) o 3 de febrero de 1861 (o día de Sant Blas) y muerto en Zaragoza (comarca de Zaragoza) en chulio de 1938, estió un destacato cantaire aragonés de hota aragonesa, muit conoixito en estar o primer ganador, o 19 d'octubre de 1894, d'o I Certamen Oficial de Hota Aragonesa convocato por o concello de Zaragoza, ganando amás o Premio Extraordinario d'ixe mesmo certamen en 1899 y 1904. Residiba en a ciudat de Zaragoza dende que remató en 1885 o suyo servicio melitar.

Chunto con Antonio Pozo (O Mochuelo) estió uno d'os primers cantaires de hotas en gravar as suyas cantas en os celindros de cera (antecesors d'os actuals discos), fácil que en 1898-1903. Destacaba por a potencia d'a suya voz.

En zaguerías d'a suya carrera, ubrió un local en Zaragoza que esdevenió un centro de referencia t'a hota aragonesa.