Quick Facts
Biography
Benito Díaz Pereira, nado na Coruña en 1887 e finado en Aranga o 22 de xaneiro de 1938, foi un pintor e sindicalista galego.
Traxectoria
Pintor primeiro e dependente de comercio despois, militante da CNT coruñesa dende os anos dez. Foi directivo da Sociedad de Pintores La Lealtad da Coruña dende 1914. En 1917 era tesoureiro do Centro de Estudios Sociales Germinal. Asistiu ao Congreso da CNT de Madrid en 1919. Foi desterrado a Baltanás (Palencia) no verán de 1919 polo paro xeral en solidariedade coa folga de La Canadiense. En xaneiro de 1920 foi detido na Coruña pola explosión de varios petardos, e en maio participou nun mitin pedindo a reapertura dos locais sindicais clausurados. No resto da década dos vinte e dos trinta mantivo a súa militancia na CNT e o seu vencello co Centro de Estudios Sociales Germinal. Coa sublevación do 18 de xullo de 1936 abríuselle causa militar na Coruña. O 22 de xaneiro de 1938 apareceu en Aranga o seu cadáver con disparos de arma de fogo.