Arakel Movsisyan

Առաքել Աբրահամի Մովսիսյան, (հանրության շրջանում հայտնի է Շմայս մականունով) (օգոստոսի 20, 1966(1966-08-20), Վաղարշապատ), հայ, ՀՀ ԱԺ նախկին պատգամավոր։

1993-1997 թթ.-ին սովորել է Ստեփանակերտի մանկավարժական ինստիտուտում՝ ստանալով մարմնակրթություն մասնագիտություն։

Մովսիսյանը աչքի է ընկնում ոչ միայն իր հայհոյանքներով, հայ գրականության հանդեպ անհարգալից վերաբերմունքով։ Հայկական ժամանակ օրաթերթի լրագրողուհու այն հարցին, թե ինչպես է վերաբերվում Համո Սահյանի աշխատություններին կամ գրքեր կարդում է, թե ոչ, պատգամավորը պատասխանել էր հետևյալ կերպ. -«Բան ու գործ չունենք, Համո Սահյան եք դրել, ավելի կարևոր գործեր ունենք»։

Չնայած մամուլում երբեմն հրապարակվում են հոդվածներ, որտեղ նշված է, որ Ա.Մովսիսյանը ազատամարտիկ է, այսինքն՝ մասնակցել է Արցախյան ազատամարտին, այնուամենայնիվ, որևէ հեղինակավոր լրատվամիջոցում կամ գրքում չեն ներկայացվում փաստեր այն մասին, որ նա իրոք մասնակցել է Արցախի ազատամարտին։ Միայն ՀՀ ԱԺ կայքն է, որ հեղինակել և հրապարակել է հետևյալ նախադասությունը՝ «1989-1995 թթ.-ին մասնակցել է Ղարաբաղյան պատերազմին»։

2004-2007 թթ. եղել է ՀՀ ԱԺ պատգամավոր թիվ 27 ընտրատարածքից։ Ընդգրկվել է ազգային ժողովի պաշտպանություն, ազգային անվտանգության եւ ներքին գործերի մշտական հանձնաժողովի անդամ։

2007-2012 թթ.-ին համամասնական ընտրակարգ կրկին ընտրվել է ՀՀ ԱԺ պատգամավոր այս անգամ արդեն ՀՀԿ ցուցակով։ 19.06.2007-31.05.2012 թթ.-ներին հանդիսացել է ՀՀ Ազգային ժողովի պաշտպանության, ազգային անվտանգության եւ ներքին գործերի մշտական հանձնաժողովի անդամ։

2012 թ.-ի մայիսի 6-ին Ազգային ժողովի պատգամավոր է ընտրվել համամասնական ընտրակարգով Հայաստանի Հանրապետական կուսակցությունից։ 2017 թ․ առաջադրվել է ՀՀԿ ռեյտինգային ցուցակով պատգամավորության թեկնածու սակայն չի ընտրվել։ 2018 թ․ հեղափոխությունից հետո դուրս է եկել ՀՀԿ-ից ու քաղաքականությունից։

Առաքել Մովսիսյանը ՀՀ ԱԺ այն պատգամավորներից է, ովքեր նախընտրում են հանրության, մասնավորապես լրագրողների հետ չշփվել, իսկ հարաբերվելիս ասված նախադասությունների մեջ գրեթե անպակաս է հայհոյանքն ու վիրավորանքը դիմացինի նկատմամբ։ ՀՀ ԱԺ նիստերի դահլիճում հաճախ կարելի է նաև ականատես լինել, թե Ա.Մովսիսյանը ինչպես է սեռական և այլ բնույթի հայհոյանքներ ու վիրավորանքներ ուղղում ընդդիմադիր պատգամավորներին։

Լրագրողների հետ պրն. Մովսիսյանի հարաբերությունները քաղաքական գործիչ - լրագրող հարաբերությունների համատեքստում չեն։ Լրատվամիջոցներում պարբերաբար հրապարակվում են Ա.Մովսիսյանի և վերջինիս հարց ուղղող լրագրողի վեճի մասին հոդվածներ։ Մասնավորապես՝ 2014 թ.-ին «Գազային համաձայնագրերի քվեարկության» ժամանակ նա ՀՀ ԱԺ դահլիճում գտնվող լրագրողների մասին ասեց հետևյալ արտահայտությունը՝ «սրանց (նկատի ունի լրագրողներին) հանեք սիկտիր արեք ստեղից»։ 2014 թ.-ի սեպտեմբերի 8-ին, պատասխանելով լրագրողի հարցին, նա ասել է. - «-Դավայ, յան տվեք սաղդ»։

Հասարակության կամ գոնե իր ընտրողների հետ շփումներով Ա. Մովսիսյանը աչքի չի ընկնում։ Մի առիթով պատգամավորը, զավեշտի վերածելով լրագրողուհու այն հարցը, թե հանդիպո՞ւմ եք Ձեր ընտրողների հետ, հայտարարել էր. - «Ի՞նչ կարիք կա ես հանդիպեմ, երբ իրանց մեջ եմ ապրում։ Ես քաղաքում տուն չունեմ, իրանց հետ եմ ապրում, բոլոր հոգսերս էլ իրանց հետ ա։ Էս տարածքում ապրում եմ, մեր գյուղն ա, բոլորի հետ կապի մեջ եմ, էթալ-գալուց սիգնալ եմ տալում, բարեւ եմ տալում, կայնում եմ, հետները հաց եմ ուտում, հետ եմ գալի տուն, ուրիշ տեղ չունեմ էթալու, ո՞ւր պըտի էթամ»։

2014 թ.-ի հուլիսին Մովսիսյանը ֆինանսավորել էր Արմավիրի մարզի Այգեկ գյուղի գյուղամիջյան ճանապարհի վերանորոգման աշխատանքների մեծ մասը։

Ա.Մովսիսյանը ամուսնացած է, ունի չորս երեխա։