Antonio Suárez

Antonio Suárez (Xixón, 26 de xineru de 1923; Madrid, 21 d'ochobre de 2013) foi un pintor asturianu.

La relación d'Antonio col arte entama nel estudiu del arquitectu xixonés Antonio Álvarez-Hevia, nel que tien de compañeru de Joaquín Rubio Camín, xunto col qu'entama'l I Salón de Navidá de Xixón nel añu 1948, añu nel que se relaciona cola Escuela de Madrid, onde se treslladara esi mesmu añu. Tamién nos sos años de formación xixonesa frecuentará los estudios d'Evaristo Valle y Nicanor Piñole. En 1950 pinta la so primer obra abstracta.

Nel añu 1951 treslladaráse a París onde vivirá unos trés años, yá que por motivos de salú torna a Xixón, onde residirá un tiempu hasta tornar nuevamente a Madrid.

Antonio Suárez foi unu de los firmantes, en 1957, del manifiestu del Grupu El Paso, xunto a autores como Canogar, Feito, Manolo Millares, Manuel Rivera, Antonio Saura y l'escultor Pablo Serrano. Más sero xuniéronse a esti ensame Martín Chirino y Manuel Viola.