Anonimi i Tivarit

Kështu është quajtur autori i panjohur i një vepre me titull “Histori e Skënderbeut”, që ka qenë botuar në Venedik rreth vitit 1480. Kjo do të ishte biografia më e vjetër e heroit tonë kombëtar. Vepra nuk njihet, por i vetmi që e përmend është historiani italian Xhanmaria Biemi i Shek. XVIII, që pretendon se kishte gjetur një ekzemplar të vjetër e mjaft të dëmtuar, prej të cilit citon pasazhe mjaft të gjera. Sipas tij, autori ishte një shqiptar prej Tivari, vëllai i të cilit paska shërbyer në ushtrinë e Skënderbeut. Vetë Biemi e cilësoka veprën si më të plotë e ciëlsore sesa ajo e Barletit, por kritika moderne historiografike ka dhënë arsye të rëndësishme për të mohuar ekzistencën, autenticitetin dhe vlerën e Anonimit të Tivarit.