Yudian Wahyudi

Prof. Drs. K.H. Yudian Wahyudi, M.A., Ph.D. (

lahir di Balikpapan, Kalimantan Timur, 17 April 1960; umur 59 tahun)

marupakan pengajar wan akademisi Indunisia. Wayah ini, inya manjabat sabagai Kepala Badan Pembinaan Ideologi Pancasila (BPIP) mulai 5 Februari 2020. Panambayannya, inya manjabat sabagai Rektor UIN Sunan Kalijaga Yogyakarta piriode 2016-2020. Inya manjabat sabagai guru besar Fakultas Syari'ah dan Hukum UIN Sunan Kalijaga.

Yudian dikirim ka Ponpes Termas mulai umur 12 tahun wan inya marasa nang kaya anak nang ‘dibuang'. Panambaiannya, inya balajar mangaji di Balikpapan, Kalimantan Timur, tapi balum bisa bapandir basa Arab. Inya mulai bisa bapandir basa Arab imbah sudah ba'andak di Termas.

Abahnya adalah tentara jaman revolusi nang ditugas'akan pamarintah di Balikpapan, Kalimantan Timur, tahun 1948, wan inya lahir di sana. Tatapi, gara-gara Yudian nakal, katuju bakalahi, inya ‘dibuang’ ka pasantren. Alasannya nang sabujurnya adalah abahnya handak mondok ka Termas, tetapi karean kuitannya kada tapi baduit. Jadi, kada jadi, akhirnya inyalah nang dimasukakan ka sana.

Inya adalah lulusan Pondok Pesantren Tremas, Pacitan 1978 aan Pondok Pesantren Al Munawwir Krapyak, Yogyakarta pas 1979. Salain ngitu, inya mandapat galar Bachelor of Art (BA) wan doktorandus di Fakultas Syariah IAIN Sunan Kalijaga Yogyakarta pas 1982 wan 1987, lawan BA dari Fakultas Filsafat UGM pas 1986.

Tahun 1988, Mantri Agama Munawir Sjadzali maulah program Pambibitan Calon Dosen IAIN se-Indunisia. Urang nang dipilih syaratnya, IP mahibaki syarat sabagai dosen, bisa basa Arab wan Inggris. Yudian kada bisa babasa Inggris waktu ngitu. Akan tatapi, inya baisi 10 tarjamahan basa Arab ka Indunisia wan baisi ijazah BA dari Fakultas Filsafat UGM. Inya lulus wan masuk 20 besar. Imbah ngitu, maumpati palatihan sambilan bulan wan anam bulan basa Inggris. Imbah maumpati palatihan habyar tulak ka Kanada, 1991. Tahun 1993, inya manuntung'akan MA. Imbah MA, inya kursus basa Inggris pulang gasan manyiapakan diri gasan ma'ambil gelar doktor. Sabab, gasan ma'ambil beasiswa program doktor, liwar ngalihnya. Salain basa Inggris, inya umpat jua kursus basa Prancis. Hittungannya bujur. Tahun 1994, inya maumpatu tes wan barhasil mamanang'akan beasiswa gasan doktor.

Mangutip pamandiran Harian Republika edisi 6 April 2009, Yudian mamacahakan rikur sabagai dosen pamulaan dari Parguruan Tinggi Agama Islam Negeri (PTAIN) nang barhasil manambus Harvard Law School di Amerika Serikat (AS) pas 2002-2004. Rekor ngitu didapat'akannya imbah manuntung'akan pandidikan doktor (PhD) di McGill University, Kanada. Inya bahasil jua manjadi profesor wan tagabung dalam American Asosiation of University Professors piriode 2005-2006, lawan dipercaya ma'ajar di Comparative Department, Tufts University, AS.

Salawas karirnya, Yudian sudah banyak manulis artikel ilmiah nnag batema'akan Islam kontemporer. Sapalih di antaranya adalah Aliran dan Teori Filsafat Islam (1995), Hassan Hanafion Salafism and Secularism (2006), dan Berfilsafat Hukum Islam dari Harvard ke Sunan Kalijaga (2014). Yudian tamasuj panulis wan panarjamah nang produjtif. Inya sudah manarjamah'akan 40 buku basa Arab, 13 basa Inggris, wan talu buku babasa Prancis ka basa Indunisia. Pas 2016, inya umpat maulah TK, SD dan SMP Sunan Averroes Islamic Boarding School.

Salawas manjabat rektor, Yudian sawat maulah kabijakan kada mambulih'akan paggunaan cadar gasan mahasiswi di UIN Sunan Kalijaga.

Ia mangaluar'akan surat kaputusan B-1031/Un.02/R/AK.00.3/02/2018 parihal pambinaan mahasiswi bacadar tatanggal 20 Pebruari 2018. Kabijakan Yudian maulah timbulnya protes dari bamacam-macam pihak, biar ada jua nang mandukung.

Inya ba'alasan palarangan ngitu gasan manjaga idiologi mahasiswa wan mahasiswi UIN Kalijaga lawan manyamani kampus amun haratan kagiatan belajar mengajar.

Misalnya, Yudian curiga mahasiswi nang bacadar bisa nyaman banar mamakai joki haratan ujian dan kadada nang tahunya.

"Jadi harus bijak melihat ini. Anak-anak baru itu datang dari kampung, lulus dari sekolah malah 'digarap' sama orang luar kampus, doktrin ideologi tertentu. Kita harus selamatkan agar tidak tersesat," ujar Yudian pas dihubungi CNNIndonesia.com, 6 Maret 2018.

Tapi, balum sawat sabulan surat ngitu tadi balaku, inya mancabut kabijakan larangan cadar ngini. Inya mangaluar'akan surat banomor B-1679/Un.02/R/AK.00.3/03/2018.

Surat nang dikategori'akan basifat panting ngitu takait pancabutan surat tentang pambinaan mahasiswi bacadar batanggal 10 Maret 2018. Dalam surat ngitu tatulis, badasarkan hasil Rapat Koordinasi Universitas (RKU) pas Sabtu, 10 Maret 2018, diputus'akan bahwa Surat Rektor Nomor B-1301/Un.02/R/AK.00.3/02/2018 tentang Pembinaan Mahasiswi Bacadar dicabut.

Dijalas'akan alasan pancabutan aturan pambinaan mahasiswi bacadar ngitu gasan manjaga iklim akademik nang kondusif.

Haratan diangkat jadi katua BPIP (Badan pambinaan Idiologi Pancasila) inya suah manyambat parnyataan nang kontroversial, inya manyambat bahwa "Agama adalah musuh terbesar Pancasila" parnyataannya ngini kada sampat lawas maulah masalah di Indunisia.