Patricia Krafcik

Патриция Крафчик, * 5. марец 1949, Кливленд, Огайо — универзитна професорка и културна активистка русинского оброджѣня в США.

Походжѣня

Патриция Крафчик походить з родины карпаторусинскых и словацкых емигрантох (зоз русинскых сел Руська Воля и Чирч, ай словацкых Фричовець и Кошицкой Новой Всѣ) в тогдышной Австро-Мадярщинѣ з добы перед Первов свѣтовов войнов; днесь то Словакия.

Штудии и педагогична робота

Штудовала русску филологию на Универзитѣ Индианы (1967–1971, бакаларь) и Колумбийской универзитѣ (1980, доктор в русской литературѣ и славянском фолклорѣ). Преподавала русску литературу на Питтсбургской универзитѣ (1980–1985), Дикинсоновом коледжу в Карлайслу, Пенсилвания (1985–1989), и в Евергринском штатном коледжу в Олимпии, Вашингтон (1989–доднесь).

Робота про русинску културу

Была закладательков и довгорочнов редакторков часописа Carpatho-Rusyn American (1978–1984, 1988–1997), сполуредакторков едиции Класикы карпаторусинской наукы, в котрой доднесь вышли уже 14 томы, а суть то цѣнны монографии вызнамных ученых, як примѣром Александер Бонкало, Атанасий Пекар, Алексей Петров. Организовала даколько конференций зоз карпаторусинской тематикы через вплывну фахову Америцку асоциацию про розвой славистичных штудий (AAASS, днесь ASEEES). Была едным з организаторох каждорочной лѣтньой школы Studium Carpato-Ruthenorum, котра од року 2010 стабилно фунгуе на Пряшовской универзитѣ, а перешло ньов за первы 10 рокы далеко понад 200 штудентох. За тым стоить велика участь Патриции Крафчик, котра все помогла каждому зо заинтересованых жадательох рѣшити вшиткы проблемы, котры мог мати. Окрем рекрутованя штудентох выучуе на той школѣ етнографию, а тыж участнить ся при выуцѣ русинского языка. Од основаня доднесь е активнов сполупрацовничков Карпаторусинского выглядовного центра (Carpatho-Rusyn Research Center).

Жерела и одказы

• Павло Роберт Маґочій: Кравчик Патриція (Krafcik Patricia A.) //Енциклопедія історії та культури карпатських русинів. Укладачі Маґочій П.Р., Поп І. — Ужгород: Вид-во В.Падяка, 2010. — 856 c.+ХХХІІ с. ISBN 978-966-387-044-1 (укр.)
• Prof. Dr. Paul Robert MAGOCSI (2019). I have been privileged to know a beautiful person (PATRICIA KRAFCIK: ON THE OCCASION OF HER 70TH BIRTHDAY) (по англицкы) (ФОТО, русинскый переклад). RusynAcademy.sk. http://www.cms3.rusynacademy.sk/?16-8-2019-Мав-єм-тото-привілеґіє-спознати-красного-чоловіка&fbclid=IwAR0nuPpbvdbAQigKGOZ4WLNVXosZ090GTPmK5t6v_wfshBt7mbGbE5gvj4o. Одказ перевіреный 2019-08-19. 

Референции