Miloslavsky, Petr Petrovich

Петро Милославскый, русс. Петр Петрович Милославский, *23. юн (11. юн Юл. кал.) 1896, Ямбург Санкт-Петербургской губернии, Российска империя – †12. апрѣль 1954, Сибирия, СССР — хормайстер, умѣлствознатель, композитор, учитель з числа особ российской пореволучной емиграции на Подкарпатской Руси.

Биография

По закончѣню промысловкы в року 1913 быв приятый до Петербургского (од року 1914 Петроградского) Технологичного Инштитуту на Механичне оддѣлѣня, де едночасно зоз высокошколскыма штудиями (1913–1915) учив ся в Школѣ хорового спѣву и диригованя А. А. Архангелского. Штудии му перервала мобилизация до войска. По фебруаровой револуции року 1917 зостав хормайстром в городах Донбаса. В року 1919 быв мобилизованый до Бѣлой гарды, а по ей поражцѣ в року 1920 з бѣлогардѣштами быв евакуованый до Турции, пак до Алжиру.

В марцу 1922 з групов иншых штудентох быв посланый до Прагы, де продовжив штудии в Пражском политехникумѣ и яко слухатель навщѣвовав Русскый педагогичный инштитут имени Яна Амоса Коменского. Активно ся залучив до сполоченского живота, працовав в емигрантском выдавательствѣ Пламя, выступовав з окремыма публикациями и статьями в периодиках, в котрых пропаговав русске музичне и хорове умѣня; быв членом Сполку писательох и новинарьох ЧСР.

Спѣвав в Штудентском русском хорѣ и Козацком донском хорѣ. В року 1933 музично-драматичне общество Боян позвало П. Милославского до Ужгорода, котрый ся став его домом до конця живота. Працовав як учитель в тутешных школах, быв хормайстром общества Боян и учительского хора Ужгородского округа.

В 1930-х роках хор Боян концертовав и зыскав собѣ славу и за границями Подкарпатской Руси, по цѣлой републицѣ. выступовав з публикациями в периодиках, на радио, з помочов и порадами зачаточникам хорового спѣву. Як мож ся дознати з его инзерату в едной тогочасной новинцѣ, музична литература, «списки и каталоги нот, подробныя свѣдѣнія и пр. — высылаются по первому требованію. С запросами обращаться на имя П. П. Милославскаго, по адресу Mytná ul. č. 5, Užhorod, Podkarpatská Rus».

Од року 1939 по приходѣ Мадярох и до конця войны быв учительом в Середньому. В року 1945 за службу в Бѣлой гардѣ быв репресованый и высланый до Донбасу, але уже в року 1946 быв регабилитованый и зостав умѣлецкым ведучым, а пак и директором Закарпатского ансамблу пѣснѣ и танцю, котрый под его веджѣньом в року 1947 быв реорганизованый на Закарпатскый народный хор. П. Милославскый скончав ся на пробѣ в часѣ концертованя хора по Сибирии и на Сахалинѣ; погребеный на теметовѣ Калвария в Ужгородѣ, сектор №3.

З публикаций

• Милославский П. П.: А. А. Архангельский, его жизнь и деятельность //Русский Хоровой Сборник. Прага: Издание Общественного Русского хора имени А. А. Архангельского, 1930
• Милославский П. П.: Русское хоровое дело в Праге //Постников С. П.: Русские в Праге. Прага. 1928. С. 339.
• (В сполуавторствѣ) Народнҍ пҍснҍ подкарпатскихъ русиновъ. {{|Ч. І.}} Зобрали: Д. Задоръ, Ю. Костьо, П. Милославский. Унгваръ, 1944. Выданя Подкарпатского Общества Наукъ. Народна библіотека, ч. 27.

Жерела и одказы

• Алмашій М.: Милославський Петро Петрович //Енциклопедія історії та культури карпатських русинів. Укладачі Маґочій П. Р., Поп І. — Ужгород: Вид-во В. Падяка, 2010. — 856 c.+ХХХІІ с. ISBN 978-966-387-044-1 укр. Сс. 459–460.
• Грін О.: Божественний регент // Карпатський край. 1994. № 5–6, сс. 75–76. укр.
• Милославский (Miloslavski) Петр Петрович. Лица русской эмиграции. 2017. http://rusgrave.tmweb.ru/card.php?id=2129. [перевірено 2021-07-10].  русс.
• Росул Т. І. (2018). Милославський Петро Петрович. //Енциклопедія Сучасної України: електронна версія / гол. редкол.: І. М. Дзюба, А. І. Жуковський, М. Г. Железняк та ін.; НАН України, НТШ. Київ: Інститут енциклопедичних досліджень НАН України. http://esu.com.ua/search_articles.php?id=64514. [перевірено 2021-07-10].  укр.

Референции