Martín Díez de Aux

Martín Díez d'Aux (Daroca, 2ª metat d'o sieglo XIV - Castiello d'Exativa, 1440) estió Chusticia d'Aragón entre 1434 y 1439, quan fue destituito, y sinyor d'Alfoceya. Estió tamién lugartenient d'o baile cheneral entre 1417 y 1424 (estando por ixas envueltas bailes Alvaro de Garavito y Chuan Lopez de Gurreya) y baile cheneral en 1431. Se casó de primeras con Isabel Cerdán y, dimpués d'enviudar, de segundas nupcias con Ana Ximenez de Liñán.

Gran conoixedor d'os costumbres y fueros aragoneses, en fació una replega en un texto que s'aprebó en l'anyo 1437 en Cortz d'Alcanyiz. Tamién consiguió en ista mesma asambleya a inmunidat d'o Chusticia, ye decir, que dende alavez os chusticias d'Aragón, asinas como os suyos lugartenients y oficials, no podeban estar acusatos si no yera debant d'o rei y con os suyos machistratos presents. Dimpués d'iste feito se le pidió que deixase o cargo, y en negar-se-ie fue apresonau en 1439 por o lugartenient Chuan de Navarra, por orden d'o rei Alifonso V y tresladato ta la garchola d'o castiello d'Exativa, a on murió a l'anyo siguient. O suyo cuerpo se tresladó ta Zaragoza, a on ye apedecato en a ilesia d'o convento de Sant Francisco.

Vinclos externos

• (es) Martín Díez d'Aux en GEA