Johann Hinrich von Spilker

Johann Hinrich (von) Spilker (* 24. März 1675 in Hannover; † 20. Juni 1746 in Stood) weer en düütschen Jurist.

Spilker is 1675 as Söhn von Dorothea Magdalena, borene Bünting, un den Hoff- un Kunssistorialraad Burchard Spilker in Hannover boren. He harr eerst Ünnerricht bi Huuslehrers un weer denn bet 1695 op de öffentliche School in Hannover. Von dor güng he an de Universität Helmstidde un hett dree Johr lang Juristeree studeert. Noch twee Johr hett he denn an de Universität Jena studeert. Na dat Studium güng he 1700 op Reisen dör Italien, Frankriek, England un Holland un hett sik noch wieder mit dat Recht, Staatswetenschoppen, de Künst un de Naturwetenschoppen beschäftigt. 1706 hett em denn Eberhard Ludwig von Württemberg to’n Oberraad maakt un Spilker weer 1707 bi verscheden Kreisdaag dorbi, ünner annern in Biberach, Nördlingen un Eglingen. Dat Amt as Oberraad hett he 1708 aver wedder opgeven. 1712 hett em Kaiser Karl VI. in’n Adelsstand hoven. 1713 güng he denn in’n kurhannöverschen Deenst un is Oberopseher in de Graafschop Mansfeld worrn. Von dor is he 1715 as Justizraad un Hoffgerichtsassesser an dat Hoffgericht Stood versett worrn. Tosätzlich is he 1716 in Stood Kunsistorialraad worrn. 1736 is he Viezdirekter von de Justizkanzlie Stood un dat Hoffgericht Stood worrn. Ok dat Amt as Direkter von dat Kunsistorjen in Stood weer dor mit verbunnen. Ofschoonst sien Titel Viezdirekter weer, harr he dat Leid över de Gerichten. 1738 is he denn ok den Titel na Direkter von de Gerichten worrn. Dat is he bet to sien Dood 1746 bleven.

Von Spilker weer verheiraadt mit Sophia Eleonora Gackenholz. De beiden harrn de Kinner Hinrich Eberhard († 1754), Charlotte Louise († 8. September 1776), Georg Arnold (5. Januar 1722–30. November 1794) un Ludewig Johann Moritz († 27. März 1762).