Ignacio Cuesta Areces

Ignacio Cuesta Areces (1  de febreru de 1972, Uviéu) ye un políticu y abogáu asturianu. Anguaño ye'l Primer Teniente d'alcalde del Ayuntamientu d'Uviéu.

Biografía

Ñació n'Uviéu en febreru de 1972 y anguaño vive ellí, onde estudió y se llicenció en Drechu pola Universidá d'Uviéu. Exerz d'abogáu dende 1998, ye asesor xurídicu en dellos colexos profesionales y ye decanu nel Ilustre Colexu d'Abogaos d'Uviéu. Nel ámbitu mercantil, como alministrador concursal asumió la llevanza de diversos concursos d'acreedores en toa España. Tamién foi direutor de la Escuela de Práctica Xurídica del Principáu d'Asturies dende l'añu 2013 y coordinador Xeneral del Centru d'Estudios del ICAO dende l'añu 2009 hasta xunu de 2016.

Trayeutoria política

Foi escoyíu por Ciudadanos pa ser el cabezaleru del partíu nes eleiciones municipales d'Uviéu de 2019. Nestos comicios llogró superar a Somos Uviéu, quien quedara en segunda posición nes eleiciones municipales de 2015 con 6 conceyales. Ignacio Cuesta llogró'l sofitu del 16,12% de los votantes uvieínos, darréu fizo un pactu de gobiernu col candidatu del Partíu Popular n'Uviéu, Alfredo Canteli. Anguaño lleva la Conceyalía d'Urbanismu, Mediu Ambiente, Infraestructures y Distritu del Ayuntamientu d'Uviéu.

Ver tamién

• Ciudadanos

Referencies

Enllaces esternos

• Wikimedia Commons acueye conteníu multimedia sobre Ignacio Cuesta Areces.