Fiorenzo Caterini

Fiorenzo Caterini (Lodi, 1965) est un'antropòlogu, iscritore e ambientalista sardu, istudiosu de s'istòria, de sa cultura e de sa natura de sa Sardigna.

Biografia

Nàschidu in Lodi, at istudiadu Benes Culturales e Antropologia Culturale in s'Universidade de Tàtari, laureende·si in ambas cosas cun su màssimu de sos votos. A pustis est intradu in in su su Corpus Forestale, in ue a primu est istadu ispetore, e a pustis est divènnidu cumandante de s'Istatzione Forestale de Locusantu.

In su 2013 at publicadu "Colpi di scure e sensi di colpa", su primu sàgiu istòricu e antropològicu suo, fatu in collaboratzione cun su Dipartimentu de Iscièntzias Umanas de s'Universidade de Tàtari, diretu dae Mario Atzori, e cun su Corpus Forestale e de Vigilàntzia Ambientale. In cussu libru at analizadu s'istòria de s'isperdìtziu de sos padentes sardos e s'efetu chi custu acadimentu at tentu in s'idea chi sos sardos e sos istràngios tenent, in dies de oe, de sa Sardigna siat de oe siat de eris.

Su sàgiu at tentu unu sutzessu mannu, tantu chi l'ant torradu a imprentare chimbe bortas in pagos annos, e at bèndidu prus de 5000 còpias. In prus, pro unos cantos meses est abarradu in sa de tres positziones in sa classìfica de sa setzione "ambiente" de Amazon. Semper in su 2013, e pro cussu libru, Caterini at retzidu su prèmiu "Siro Vannelli" pro "sa divulgatzione de sa cultura ambientale e forestale in Sardigna".

In su 2017 at publicadu su de duos sàgios suos, "La Mano destra della storia" in ue at analizadu su tema de sa demolitzione de sa memòria e de su problema istoriogràficu in Sardigna, chistionende de sas resones istòrica e de sos protzessos de su tempus coladu e de oe. Fintzas custu libru, chi est in continuidade, fintzas si dialètica, cun òperas de autores che a Raimondo Carta Raspi, Mialinu Pira e Placido Cherchi, at tentu unu sutzessu mannu, e sas presentatziones de ambas òperas sunt arribbadas a èssere prus de 200. Fintzas gràtzias a s'ispiratzione bènnida dae su traballu suo, sos CESP COBAS Iscola Sardigna ant isseberadu de organizare su progetu "La maestra muta", pro batire in giru pro sa Sardigna, in sos seminàrios pro sos insegnantes, su problema istoriogràficu sardu.

In su 2020 at dichiaradu, in unas cantas intervistas, chi est iscriende àteros duos libros: unu romanzu e su de tres sàgios. Su romanzu, "La notte in fondo al mare" l'at publicadu in su 2021.

In paris a s'atividade comente iscritore, Caterini at fintzas iscritu artìculos medas pro su situ SardegnaBlogger, in ue est fintzas redatore, e at tentu risultados de annotu comente isportivu, binchende tìtulos de mesufundu in atlètica e in su triathlon a livellu regionale.

Òperas

Sàgios

• (IT) Fiorenzo Caterini, Colpi di scure e sensi di colpa: storia del disboscamento della Sardegna dalle origini a oggi, Tàtari, Carlo Delfino editore, 2013, ISBN 978-88-7138-704-8, OCLC 955224912.
• (IT) Fiorenzo Caterini, La Mano destra della storia: la demolizione della memoria e il problema storiografico in Sardegna, Tàtari, Carlo Delfino editore, 2018, ISBN 978-88-9361-068-1, OCLC 1105442808.

Romanzos

• (IT) Fiorenzo Caterini, La notte in fondo al mare, Tàtari, Carlo Delfino editore, 2021, ISBN 978-88-9361-242-5.

Riferimentos

1. ↑ (IT) Giacomo Ganzu, Al “Logudoro” di Pavia grande successo della presentazione del volume di Fiorenzo Caterini “Colpi di Scure e Sensi di Colpa. Storia del disboscamento della Sardegna” (PDF), in luigiladu.it, 14 freàrgiu 2017. .
2. ↑ (IT) Intervista con l'autore: Fiorenzo Caterini, in Librando, 5 martzu 2020. .
3. ↑ (IT) Giovanni Fara, Intervista a Fiorenzo Caterini, in #IndieLibri, 22 santandria 2018. .
4. ↑ (IT) Colpi di scure e sensi di colpa, in Sardegna Biblioteche. .
5. ↑ (IT) Francesca Bianchi, Apprendere la Propria Storia (Fiorenzo Caterini, la ricostruzione della memoria in Sardegna), in Tottus in pari, nº 839, santandria 2020. .
6. ↑ Premio Siro Vannelli, in www.assfor.it. .
7. ↑ (IT) Giorgio Pisano, Quattro passi con Fiorenzo Caterini. Un viaggio antropologico all'interno di noi stessi, in YouTube.
8. ↑ (IT) La notte in fondo al mare (Fiorenzo Caterini), in Carlo Delfino editore. .

Ligàmenes esternos

• (IT) Pàgina de sos artìculos de Fiorenzo Caterini, in SardegnaBlogger. .
• Fiorenzo Caterini, in SBS - Servìtzios Bibliogràficos Sardos. .