Euis Komariah

Euis Komariah nyaéta salah saurang panembang Cianjuran jeung juru kawih degung. Lahir di Majalaya, Jawa Kulon, 9 September 1949. Tilar dunya tanggal 11 Agustus 2011, di kuburkeunna di Désa Wangi Sagara, Majalaya .

Karesepna kana tembang Sunda geus dimimitian saprak manéhna leutik. Malahan mah dina umur 9 taun manéhna téh geus pinter nembangkeun tembang-tembang Sunda. Kelas 4 SD, manéhna geus naék panggung jadi juru kawih. Euis nuluykeun sakolana ka SMP V Bandung (1962), satuluyna ka SMA Pasundan. Taun 1977, anjeunna pindah sakola jeung ka Sekolah Konservatori Karawitan (KOKAR) Sunda di Bandung. Di ieu tempat, Euis neuleuman atikan karawitan sacara formal.

Bakat Euis dipulas munggaran ku ku Ansorudin, pangaping pakumpulan seni Sunda di kampungna, Cipeujeun, Pacét, Majalaya. Di dieu, Euis diajar sagala rupa seni Sunda, hususna kawih. Bakat sarta karesepna ieu terus diasah waktu manéhna di SMP. ”Waktu éta manéhna ngamimitian siaran di RRI, hususna siaran Angkatan Bersenjata di mana nu ngajentréngkeun kacapina téh mang Ebar, sarta nu niup sulinga mang Engkos. Saprak wawuh jeung mang Ebar, euis mimiti mikawanoh sarta bisa nembangkeun tembang Sunda Cianjuran.

Sajumlah pasanggiri tembang Sunda kungsi diiluan. Dina ampir saban pasanggiri anu diiluan, pamajikan koréografer Sunda nu kawentar, Gugum Gumbira, ieu sok jadi jawara. Tapi anu pangnapelna dina haté manéhna mah nyaéta pasanggiri anu diayakeun ku Damas dina taun 1962, mangsa éta manéhna karék umur 13 taun. Dina kategori tembang Sunda cianjuran ieu manéhna jadi pinunjul kadua. Mémang, waktu éta Euis kakara mimiti miluan pasanggiri, sumawona tembang Cianjuran tacan lila diteuleuman. Pasanggiri Damas dua taun saterusna, 1964, rada istiméwa pikeun menéhna, alatan sakaligus miluan leuwih ti hiji katégori. Di dieu manéhna hasil meunangkeun sababaraha piala. Taun 1977 nyaéta taun pamungkas pikeun Euis miluan pasanggiri.

Sora indung ti opat anak awéwé ieu kacida halimpu. Sipat sorana pas pikeun nembangkeun tembang Sunda. Ngaliwatan grup seni Sunda ”Dewi Pramanik” tuluy ”Jugala” (grup seni Sunda sarta studio rékaman anu diadegkeun babarengan jeung salakina) Euis ngarékam tembang, kawih sarta degung. Sajaba ti éta, Euis ogé nyieun sababaraha lagu, anu kawentar di antarana nyaéta Kutamaya.

Minangka guru mamaos, Euis dipikawanoh tulatén nungtun murid-muridna dina ngawasa téknik vokal. Sawatara pangajén widang kasenian ditarima ku Euis. Dina taun 1988 manéhna dibawa ku Nano S. ngirilingan dayeuh-dayeuh di Jepang.

Euis Komariah tilar dunya di Rumah Sakit Santosa Bandung di tanggal 11 Agustus 2011 kira-kira jam 02.15 ku lantaran gering.

Tempo ogé

• Cianjuran
• Degung

Rujukan

• Apa dan Siapa Orang Sunda, Ajip Rosidi