Ernst Meyer

Ernst Meyer (* 17. Dezember 1927 in Hahnenkamp; † 2. Januar 2012 in Norderstedt) weer en plattdüütschen Schriever.

Meyer is 1927 in Hahnenkamp boren un weer dor ok op de Volksschool. Later weer he op dat Realgymnasium in Elmshorn. Bi’n Tweten Weltkrieg müss he as Flakhelper, bi’n Arbeidsdeenst un as Panzergrenadier mitmaken. 1947 hett he dat Abitur maakt un hett denn in Hamborg as Hannelsvertreder för Textilünnernehmens arbeidt. 1986 hett he de Arbeid vonwegen de Gesundheit nageven. Meyer is 2012 in Hamborg na en Operatschoon an’t Hart doodbleven. Meyer weer verheiraadt un harr dree Döchter.

To de plattdüütsche Schrieveree hett em vör allen Clara Kramer-Freindohl bröcht. Nadem Kramer-Freindohl 2005 doodbleven weer, hett Meyer von ehr ok de Plattdüütsch-Kolumne bi de Norderstedter Zeitung övernahmen. Ok in de Kieler Nachrichten un in’n Kurier in Niegenbramborg sünd Texten von Meyer rutkamen.

Bi’n Schrievweddstried Vertell doch mal hett sien Geschicht Hartpuckern dat ünner de Winnergeschichten schafft.

Warken

• Wenn du oolt warrst... Een plattdüütsch Höörbook. (CD) MoinMoin Tonstudio-Musikverlag, Quickborn [2001], ISBN 3-937157-00-X
• Allens för de Katt. Een plattdüütsch Hörbook. (CD) MoinMoin Tonstudio-Musikverlag, Quickborn [2003], ISBN 3-937157-01-8
• Jümmers in Uniform. Ut mien Tiet vun 1933 - 1945. een plattdüütsch Höörbook. (CD) MoinMoin Tonstudio-Musikverlag, Quickborn [2004], ISBN 3-937157-06-9
• Wiehnachtsgeschichten. (CD) MoinMoin Tonstudio-Musikverlag, Quickborn 2006, ISBN 3-937157-13-1
• Gröönkohltiet. Een plattdüütsch Hörbook. (CD) MoinMoin Tonstudio-Musikverlag, Quickborn 2007, ISBN 3-937157-19-0