Bjarnat Nowak

Bjarnat Nowak (* 20. awgusta 1925 w Kozarcach; † 27. junija 2022 we Łupjanskej Dubrawce) bě serbski wučer, kulturnik, Domowinski funkcionar a publicist.

Nowak běše wot 1953 do 1956 a znowa wot 1958 do 1964 prěni sekretar zwjazkoweho předsydstwa Domowiny, skutkowaše wot 1979 do 1983 jako intendant Němsko-Serbskeho ludoweho dźiwadła a nawjedowaše Folklorny centrum w Domje za serbske ludowe wuměłstwo. Hišće jako wuměnkar běše wón župan Domowinskeje župy „Jan Arnošt Smoler“.

Jako sekretar zwjazkoweho předsydstwa běše w lěće 1956 – za čas destalinizacije – prěni zastupjer Domowiny, kiž zjawnje wo „stagnaciji při rozrisanju narodneho prašenja Serbow“ rěčeše. Nowak namjetowaše, Domowinu hladajo na spad ličby čłonow na ryzy kulturnu organizaciju přetwarić a so politiskeje dźěławosće w zmysle natwara socializma wzdać. W samsnym lěće kritizowaše wón bój Domowiny přećiwo tak mjenowanemu „serbskemu nacionalizmej“. W juniju 1964 zhubi Nowak jako prominentny prócowar za Domowinu jako kulturnu organizaciju swoju funkciju jako 1. sekretar a wuzamkny so ze zwjazkoweho předsydstwa.

Nóžki

1. ↑ Peter Schurmann: Sorbische Interessen und staatliche Minderheitenpolitik in der DDR. LND, Budyšin 2016, str. 47–50.